Ish-presidenti i SHBA-ve, Barack Obama ka vënë në pikëpyetje se përse tragjedia e nëndetëses Titani me 5 të vdekur ka marrë mbulim mediatik minutë pas minute, ndërkohë që një anije që u fundos me 700 refugjatë në bord është injoruar.

Krahasimet i bëri teksa po fliste në Fondacionin Stavros Niacrchos në Athinë, disa orë para se Roja Bregdetare e SHBA-ve të konfirmonte se nëndetësja kishte shpërthyer.

“Është e papërshtatshme që ekspedita të ketë marrë më shumë vëmendje sesa qindra të vrarë nga mbytja e një anije në brigjet greke.

Tragjedia me nëndetësen po merr mbulim minutë pas minutë në të gjithë botën. Kjo është e kuptueshme sepse ne të gjithë duam dhe lutemi që këta njerëz të shpëtohen. Por, fakti që kjo ka marrë shumë më tepër vëmendje sesa 700 njerëz u mbytën është një situatë e papërshtatshme.

Organizata Ndërkombëtare për Migracionin e quajti atë një nga ‘tragjeditë më të këqija detare në dekadën e fundit”, u shpreh Obama, raportojnë mediat.

Anija e mbipopulluar me qindra refugjatë pakistanezë, sirianë, egjiptianë dhe palestinezë u fundos më 14 qershor, dy ditë para se turneu i OceanGate me vlerë 250,000 dollarë në rrënojat e Titanikut të raportohej i zhdukur. 82 pasagjerë janë gjetur të vdekur, 104 nga më shumë se 750 në bord janë shpëtuar, dhe pjesa tjetër janë ende të zhdukur. Më shumë se 100 fëmijë janë në mesin e të zhdukurve.

Viktimat nga mbytja e nëndetëses Titan janë CEO i OceanGate Stockton Rush, eksperti francez i Titanikut Paul-Henri Nargeolet, miliarderi britanik Hamish Harding, biznesmeni pakistanez Shahzada Dawood dhe djali i tij Suleman, i cili ishte vetëm 19 vjeç.