Autoritetet në fshatin holandez Omeren, i cili u bë qendra e një gjuetie për thesarin e varrosur nga nazistët gjatë Luftës së Dytë Botërore, njoftuan sot se kërkimi ka përfunduar dhe se asgjë nuk është gjetur.

Sipas raportimeve, thesari nazist vërtet ishte varrosur në atë fshat, por u hoq pas përfundimit të luftës, shkruan “The Guardian”.

“Ne kemi arritur në përfundimin se nuk ka asnjë thesar nazist në Omeren. Supozojmë se dikur ishte varrosur në Omeren, por se u hoq në një moment”, tha Brigitte van Aken-Quint, zëdhënëse për qytetin e afërt të Buren.

 Në janar, Arkivi Kombëtar Holandez zbuloi një hartë të vizatuar me dorë të shënuar me një “X” të kuqe që besohet se shënonte vendin ku ushtarët gjermanë fshehën plaçkën e tyre, duke shkaktuar një sulm të gjuetarëve të thesareve.

Dokumenti, i cili u gjet së bashku me hartën, citonte dëshminë se nazistët kishin varrosur katër kuti të mbushura me bizhuteri, gurë të çmuar dhe ar, që besohet të kenë vlerë rreth 15 milionë funte.
Thuhet se thesari u grabit nga nazistët pas bombardimit të një banke në Arnhem në vitin 1944.