Aktorja e Hollivudit, Gwyneth Paltrow, ka falënderuar anëtarët e jurisë që e gjetën atë jo përgjegjëse për një aksident me ski në vitin 2016 në një vendpushim në shtetin amerikan të Utah.

Terry Sanderson, 76 vjeç, kishte thënë se zonja Paltrow u përplas me të, duke i shkaktuar lëndime që i ndryshuan jetën.

Sanderson, i cili po kërkonte 300,000 dollarë  dëmshpërblim, tha se vendimi i së enjtes ishte "shumë zhgënjyes".

Juristët morën anën e zonjës Paltrow, 50 vjeçe, e cila fajësoi zotin Sanderson për aksidentin dhe u kundërpërgjigj për 1 dollarë plus tarifat ligjore.

Duke dëgjuar vendimin në gjykatë, zonja Paltrow ishte pa shprehje, duke ngulur sytë drejt përpara dhe dukej se po tundte lehtë me kokë. Më pas ajo doli jashtë.

Teksa u largua, ajo ndaloi për pak kohë për të folur me zotin Sanderson. Ai më vonë tha se ajo i tha: "Të uroj gjitha të mirat." Ai u përgjigj: "Faleminderit e dashur".

Në një deklaratë të postuar si një histori në Instagram për 8.3 milionë ndjekësit e saj, fituesja e Oskarit tha: "Ndjeva se pranimi i një pretendimi të rremë komprometonte integritetin tim".

Ajo tha se ishte e kënaqur me rezultatin dhe falënderoi gjyqtarin dhe jurinë prej tetë anëtarësh.

Jurisë iu deshën tre orë diskutim për të gjetur njëzëri  se z. Sanderson ishte tërësisht fajtor për incidentin.

Në rrëfimin e zotit Sanderson, aktorja u përplas me të në një shpat fillestar në Deer Valley Resort në Park City. 

Zonja Paltrow më pas u largua me ski ndërsa ai mbeti pa ndjenja në dëborë me brinjë të thyera, tha zoti Sanderson.

Aksidenti e la atë me një traumë të trurit që i ndryshoi jetën, dëshmoi ai.

Avokatët e Paltrow punuan për të minuar pretendimin e zotit Sanderson se shëndeti i tij ishte shkatërruar nga përplasja, duke vënë në dukje një listë të gjatë të udhëtimeve që ai bëri pas aksidentit në Amerikën e Jugut, Evropë dhe Marok.