Inflacioni në Eurozonë u zvogëlua për të tretin muaj radhazi në janar, sipas të dhënave paraprake nga Eurostat të publikuara të mërkurën.

Inflacioni në njëzet shtetet që përdorin monedhën e përbashkët parashikohet të ketë rënë në 8.5% nga viti në vit në janar, nga 9.2% që ishte në dhjetor. Rënia e parë u pa në nëntor, megjithëse ishte ende mbi pragun prej 10%, pasi arriti një rekord të lartë një muaj më herët.

Energjia vazhdoi të jetë nxitësi më i madh i inflacionit muajin e kaluar me një rritje prej 17.2% nga viti në vit, por çmimet janë ulur ndjeshëm në muajt e fundit.

Kjo i atribuohet temperaturave më të buta në vjeshtë dhe fillim të dimrit, rezervave të gazit të pajisura mirë dhe planeve të kursimit të energjisë në të gjithë bllokun 27-vendesh, të cilat kanë parë rënie të çmimeve të gazit në nivele të papara që kur Rusia pushtoi Ukrainën gati një vit më parë.

Megjithatë, inflacioni mbetet katër herë mbi objektivin prej 2% të vendosur nga Banka Qendrore Evropiane dhe organi drejtues i së cilës do të mblidhet në Frankfurt të enjten për të vendosur nëse do të operojë edhe një rritje të normës së interesit për të trajtuar këtë çështje.