Një ‘super kartel’ i madh droge që kontrollonte një të tretën e tregtisë së kokainës në Europë është shkatërruar, me 49 persona të arrestuar në vende të ndryshme përfshirë Francën dhe Dubain.

Operacioni i madh ndërkombëtar sekuestroi 30 ton kokainë, supermakina të bandës dhe grumbuj parash, një bastisje historike.

Policia spanjolle është shprehur se lideri i kësaj organizate është ‘një shtetas britanik’ i cili ishte larguar nga baza e tij e mëparshme në Costa del Sol për në Dubai, ku ishte vendosur tek Grupi i krimit të organizuar Kinahan, pas një tentative rrëmbimi, por që është arrestuar më pas në Dubai.

Dhe një tjetër shtetas britanik është arrestuar në Costa Del Sol, tha një burim i policisë spanjolle ndërsa oficerët bastisën një sërë vilash në Marbella, Madrid dhe Barcelonë.

Gjithashtu arrestime janë kryer dhe në Francë, Spanjë, Belgjikë dhe Holandë, tha në një deklaratë agjencia policore e BE-së.

“ Shkalla e importit të kokainës në Europë nën kontrollin dhe komandën e të dyshuarve ishte masive dhe mbi 30 ton drogë u sekuestrua nga forcat e rendit’ tha Europol.

Europol tha gjithashtu se ishin arrestuar dy të dyshuar të rrezikshëm që janë të lidhur me grupet e krimit të organizuar në Holandë, dy të tjerë në Spanjën dhe dy të tjerë të lidhur me Francën.

“Një nga të dyshuarit holandez është një peshk jashtëzakonisht i madh' tha një burim i Europolit për AFP në kushte anonimiteti.

Dhjetë persona u arrestuan në Belgjikë, gjashtë në Francë dhe 13 në Spanjë. 

Policia spanjolle tha se më shumë se 500.000 euro janë konfiskuar gjatë bastisjes në një seri vilash luksoze në Spanjë, së bashku me tre armë, makina të shtrenjta dhe ora luksoze.

Garda Civile thotë se disa nga automjetet kishin vlerë rreth 300,000 euro.

Pamjet e publikuara nga Garda Civile sot treguan oficerë të armatosur rëndë që hynë me forcë në vila ku u bënë disa nga arrestimet.

Në Spanjë, Garda Civile tha se operacioni i tyre, i quajtur Operacioni Faukas, kishte filluar me sekuestrimin e 700 kilogramëve kokainë në portin e Valencias në mars 2020. 

Një zëdhënës i forcës spanjolle tha:

"Gjatë hetimit, oficerët zbuluan se një organizatë kriminale po kontrabandonte kontejnerë me kokainë përmes porteve të Barcelonës, Valencias dhe Algeciras".

“Ata zbuluan gjithashtu se një biznes kompleks i pasurive të paluajtshme ishte organizuar në Costa del Sol për të pastruar të ardhurat nga fitimet e marra nga kontrabanda e drogës.''

“Udhëheqësi i kësaj organizate u identifikua si një britanik i lidhur me Costa del Sol, i cili duhej të linte Spanjën dhe të shkonte në Dubai pasi ishte subjekt i një tentative rrëmbimi.''

"Nga Dubai ai vazhdoi të drejtonte dhe koordinonte aktivitetet kriminale të organizatës, duke mbajtur në të njëjtën kohë kontakte të trafikut të drogës dhe interesa biznesi me pjesën tjetër të bosëve të drogës me bazë në këtë qytet të emiratit."  

Bastisjet dhe arrestimet ndodhën në të gjithë Evropën dhe në Dubai midis 8 dhe 19 nëntorit. 

Policia spanjolle e quan operacionin, të koordinuar nga Europoli si pjesë e një operacioni ndërkombëtar të koduar "Drita e shkretëtirës".

Zëdhënësi i Gardës Civile spanjolle shtoi:

"Me këtë përpjekje ndërkombëtare nga të gjitha agjencitë e përfshira, është një mesazh i fortë që po u dërgohet organizatave kriminale, që asnjë vend nuk është i sigurt për ata që përpiqen të shmangin drejtësinë".

Ata vazhduan:

"Nga Dubai, drejtuesit e këtij megakarteli kontrollonin dhe drejtonin aktivitetet kriminale të qelizave të ndryshme me bindjen se ata jetonin në një vend të shenjtë ku ndiheshin të paprekshëm."

Garda Civile thotë se tre nga të dyshuarit e mbajtur si pjesë e Operacionit Faukas, fundi spanjoll i operacionit Desert Light, konsiderohen si objektiva me vlerë të lartë nga Europol.

Nuk ishte e qartë menjëherë këtë mëngjes se sa shtetas britanikë ishin në mesin e 49 personave të ndaluar.

Një nga të arrestuarit në Dubai mendohet të jetë një shtetas panamez që furnizonte grupin me kokainë.

Një zëdhënës tha: “Ai dyshohet se është përgjegjës për futjen e drogës në portin e Manzanillo në Panama, i cili gjithashtu kishte lidhje me baronët e tjerë të drogës në Dubai.

“Organizata kriminale me bazë në Spanjë kishte dy struktura të diferencuara, pjesa që kishte për detyrë nxjerrjen e drogës në portet detare dhe tjetra përgjegjëse për pastrimin e parave nëpërmjet firmave të pasurive të paluajtshme.

“Pjesa e parë ishte e vendosur midis provincave të Barcelonës dhe Malaga-s dhe kishte një ndikim të drejtpërdrejtë në Portin e Barcelonës.

Ai përbëhej nga dy bullgarë, njëri prej të cilëve ishte një objektiv me vlerë të lartë për Europolin, dhe tre persona me origjinë spanjolle, duke përfshirë një punonjës në portin e Barcelonës, i cili ishte përgjegjës për hyrjen dhe daljen e automjeteve.

“Pjesa tjetër ishte e përbërë nga persona të cilët ishin të besuarit e liderit kryesor i organizatës kriminale.

Prokurorët holandezë thanë se do të kërkonin ekstradimin e të dyshuarve nga Emiratet e Bashkuara Arabe.

Një nga të dyshuarit ishte një burrë 37-vjeçar me shtetësi të dyfishtë holandeze dhe marokene, i cili u mbajt për dyshime se kishte importuar mijëra kilogramë kokainë në Holandë në 2020 dhe 2021.

“Këto janë vepra të rënda penale që kanë të bëjnë me trafikun ndërkombëtar të drogës, kryesisht nga Amerika e Jugut nëpërmjet porteve të Antwerp-it dhe Roterdamit”, tha në një deklaratë shërbimi i prokurorisë publike holandeze.

Tjetri ishte një shtetas i dyfishtë holandez-boshnjak 40-vjeçar.

Arrestimet priten të grumbullojnë më shumë presion mbi Kartelin Kinahan, të udhëhequr nga Daniel Kinahan i lindur në Dublin.

Danieli, babai i tij Christopher dhe vëllai i tij Christy mendohet se jetojnë në Dubai pasi kanë ikur nga Costa del Sol.