Rusia ka ndërprerë plotësisht furnizimin me gaz në Evropë përmes një tubacioni të madh, duke thënë se nevojiten riparime. Gjigandi shtetëror rus i energjisë, Gazprom, tha se kufizimet në gazsjellësin Nord Stream 1 do të zgjasin  tri ditët e ardhshme, njofton BBC.

Rusia tashmë ka reduktuar ndjeshëm eksportet e gazit nëpërmjet tubacionit.

Ajo mohon akuzat se i ka përdorur furnizimet me energji si një armë lufte kundër vendeve perëndimore.

Tubacioni Nord Stream 1 shtrihet 1200 km (745 milje) nën detin Baltik nga bregu rus pranë Shën Petersburgut deri në Gjermaninë verilindore.

Ai u hap në vitin 2011 dhe mund të dërgojë maksimumi 170 milionë metra kub gaz në ditë nga Rusia në Gjermani.

Tubacioni u mbyll për 10 ditë në korrik - përsëri për riparime, sipas Rusisë - dhe kohët e fundit ka funksionuar me vetëm 20% kapacitet për shkak të asaj që Rusia e përshkruan si pajisje me defekt.

Presidenti i rregullatorit të rrjetit të Gjermanisë ka thënë se vendi do të jetë në gjendje ta përballojë - nëse Rusia rifillon dërgesat në ditët në vijim.

"Unë supozoj se ne do të jemi në gjendje ta përballojmë atë," tha Klaus Mueller për Reuters. "Unë besoj se Rusia do të kthehet me 20% furnizim të shtunën, por askush nuk mund të thotë vërtet."

Por Ministri gjerman i ekonomisë Robert Habeck i tha Financial Times se masa tashmë ka detyruar disa kompani gjermane të ndalojnë prodhimin, një zhvillim që ai tha se ishte "alarmant".

“Nuk është një lajm i mirë, sepse mund të nënkuptojë se industritë në fjalë nuk po ristrukturohen vetëm, por po përjetojnë një këputje – një këputje strukturore, një që po ndodh nën presion të madh”, tha zoti Habeck.

Udhëheqësit evropianë kanë frikë se Rusia mund të zgjasë ndërprerjen në përpjekje për të rritur çmimet e gazit, të cilat tashmë janë rritur ndjeshëm vitin e kaluar.

Megjithatë, njoftimi i sotëm nuk pritej të ndikonte menjëherë në çmime. Çmimi kryesor i gazit natyror në Mbretërinë e Bashkuar u ul në fakt me më shumë se 15% në tregje, që nga ora 14:00 BST të mërkurën.

Rritja e madhe kërcënon të krijojë një krizë të kostos së jetesës gjatë muajve të dimrit, duke i detyruar potencialisht qeveritë të shpenzojnë miliarda për të lehtësuar barrën.

Të martën, Ministrja franceze e Tranzicionit të energjisë, Agnes Pannier-Runacher akuzoi Rusinë se po "e përdor gazin si armë lufte".

Ajo po fliste pasi Gazprom tha se do të pezullonte dërgesat e gazit për kompaninë franceze të energjisë Engie.

Por zëdhënësi i presidentit rus Vladimir Putin i ka hedhur poshtë akuzat - dhe këmbëngul se sanksionet perëndimore kanë shkaktuar ndërprerje duke dëmtuar infrastrukturën ruse.

Ai këmbënguli se "problemet teknologjike" të shkaktuara nga sanksionet janë e vetmja gjë që pengon Rusinë të furnizojë me gaz nëpërmjet tubacionit, pa specifikuar se cilat ishin problemet.

Polemika më e fundit ka qenë mbi një turbinë që mbërriti në Gjermani pasi u riparua në Kanada dhe të cilën Rusia refuzoi ta merrte përsëri, duke argumentuar se ishte subjekt i sanksioneve perëndimore.

Gjermania, megjithatë, e mohon këtë.

Në fillim të këtij muaji, Ministri i Ekonomisë Habeck tha se tubacioni ishte plotësisht funksional dhe tha se nuk kishte probleme teknike siç pretendohet nga Rusia.

Më parë këtë javë, Presidentja e Komisionit të BE-së Ursula von der Leyen premtoi të ndërhyjë në tregjet e energjisë, duke thënë në një konferencë në Slloveni se ato "nuk janë më të përshtatshme për qëllimin".

“Ne kemi nevojë për një model të ri tregu për energjinë elektrike që me të vërtetë funksionon dhe na kthen në ekuilibër”, tha ajo.

Përpara konfliktit, Gjermania kishte mbështetur, edhe pse jo çertifikuar, gazsjellësin Nord Stream 2 prej 10 miliardë eurosh (8.4 miliardë £) - i cili shkon paralel me emrin e tij - por i ndërpreu operacionet pasi Rusia dërgoi trupa në Ukrainë në shkurt.

Javën e kaluar, BBC zbuloi se Rusia ka djegur gaz me vlerë rreth 10 milionë dollarë çdo ditë në një fabrikë afër kufirit finlandez.