Ish -Komisioneri Evropian Dacian Cioloș është ngarkuar për formimin e një qeverie të re në Rumani.

Cioloș,  i cili shërbeu si kryeministër rumun nga viti 2015 në 2017 - u caktua për të provuar dhe drejtuar një ekzekutiv të ri, prej Presidentit Klaus Iohannis.

"Kam vendosur të caktoj Dacian Cioloș si kryeministër," tha Iohannis të hënën pas konsultimeve me partitë politike.

Cioloș aktualisht kryeson partinë e qendrës së djathtë USR-PLUS, e cila u largua nga ish-koalicioni qeverisës i Rumanisë në shtator.

Por lëvizja e befasishme për të emëruar politikanin 52-vjeçar nuk ka gjasa të zgjidhë ngërçin politik të vendit.

Përmbysja e Qeverisë së Rumanisë e qendrës së djathtë, humbi votëbesimin

Më 6 tetor, Qeveria e Rumanisë u rrëzua pasi një votim mosbesimi ndaj kryeministrit Florin Citu u miratua me një shumicë të madhe në parlament.  Mocioni u miratua me 281 vota, shumë më tepër se 234 të kërkuara, me deputetët e Partisë Kombëtare Liberale të Citu që e bojkotuan votimin. Ai u paraqit nga Partia Social Demokratike pasi një mocion mosbesimi i mëparshëm nga Aleanca e ekstremit të djathtë për Bashkimin e Rumunëve (AUR) u bllokua.

Të dyja partitë u mbështetën nga ish -partneri i koalicionit të Partisë Kombëtare Liberale, USR Plus, që u prish me qeverinë pas shkarkimit të Ministrit të Drejtësisë, Stelian Ion, më 2 shtator.

Kryeministri Citu, 49 vjeç, u emërua më pak se një vit më parë, por është kritikuar për trajtimin që i ka bërë krizës COVID-19, ku Rumania aktualisht është vendi i dytë më keq i vaksinuar në Evropë. Ndërkohë, pandemia ka ekspozuar mangësi serioze në sistemin e kujdesit shëndetësor të vendit, me tre zjarre vdekjeprurëse spitalore vetëm vitin e kaluar.

Kryeministri Citu do të qëndrojë si udhëheqës i përkohshëm për 45 ditë ndërkohë që Presidenti Klaus Iohannis, një anëtar i Partisë Kombëtare Liberale dhe aleati kryesor politik i Citu, të konsultohet me përfaqësuesit e të gjitha partive politike të Rumanisë për një zëvendësim. Ai mund t’i propozojë parlamentit, një kandidat të ri për këtë post dy herë, por nëse të dy refuzohen, Rumania do të përballet me zgjedhje të reja.

Presidenti Iohannis lejohet të emërojë edhe Citu, pavarësisht votës së mosbesimit, sërish për këtë post, por ka të ngjarë të përballet me armiqësi sërish nga opozita e bashkuar.

Në një deklaratë, USR Plus tha se Presidenti Iohannis ishte i detyruar të emëronte një kryeministër nga PSD - dhe jo nga Partia Kombëtare Liberale - që të mund të formohej një qeveri në koalicion me deputetët e saj në parlament.