Epidemiologu suedez Johan Giesecke, ideatori i planit “të imunitetit të tufave” për menaxhimin e pandemisë COVID-19, është promovuar nga Organizata Botërore e Shëndetësisë.

Ai do këshillojë Drejtorin e Përgjithshëm të OBSH-së, Tedros Adhanom Ghebreyesus, në përgjigje të pandemisë, sipas “Newsweek”.

Ndërkohë që shumë vende vendosën që njerëzit të qëndronin në shtëpi dhe të shmangnin kontaktet shoqërore, Suedia nuk mori masa të tilla, duke shmangur izolimin e plotë.

Në vend të kësaj, ajo u mbështet në kufizime vullnetare, duke u kërkuar njerëzve të punonin nga shtëpia kur ishte e mundur dhe të shmangnin transportin publik.

Këto masa ishin një përpjekje për të arritur “imunitetin e tufës”. Kjo frazë përdoret në kontekstin e vaksinave, ku nëse një pjesë e caktuar e njerëzve vaksinohen, atëherë do të ndihmojnë në mbrojtjen e personave të pavaksinuar nga sëmundja.

Giesecke ishte epidemiologu i Suedisë në periudhën e viteve 1995 dhe 2005. Ai konsiderohet një mentor i Anders Tegnell, i cili mori këtë rol në vitin 2013.

Sipas “thelocal.se”, në një email nga Giesecke thuhej: “Unë besoj se virusi do të shfaqet si një stuhi mbi Suedinë dhe do t’i infektojë të gjithë brenda një ose dy muajsh … Unë besoj se mijëra njerëz janë infektuar tashmë në Suedi … e gjitha do të marrë fund kur të gjithë të jenë infektuar dhe të kenë fituar imunitet, në mënyrë që virusi të mos ketë më hapësirë për t’u përhapur”.

Në maj, Giesecke tha se beson që “të gjithë do të ekspozohen” ndaj virusit në një moment dhe se “shumica e njerëzve do të infektohen”, por shumë individë do të kenë simptoma të dobëta ose të lehta.

“Mund të bëjmë shumë pak për të parandaluar këtë përhapje: një bllokim mund të vonojë rastet e rënda për një kohë, por sapo të lehtësohen kufizimet, rastet do të rishfaqen. Unë pres që kur të numërohen rastet e vdekjeve nga Covid-19 në secilin vend pas një viti, shifrat do të jenë të ngjashme, pavarësisht nga masat e marra “.

Disa shkencëtarë thanë se ideja që ndalimi i përhapjes së koronavirusit ishte “i kotë” dhe nuk merr parasysh vendet ku kjo ka patur sukses, të tilla si Zelanda e Re.

Duke u përgjigjur, Giesecke tha se mënyra për të dalë nga pandemia është përmes vaksinave.

“Nëse një vaksinë efikase zhvillohet, prodhohet në masë dhe shpërndahet në të gjithë botën, atëherë kriza do të marrë fund,” shkroi ai. “E njëjta gjë vlen për një terapi antivirale parandaluese ose me të vërtetë kuruese, në mënyrë që të mos ketë raste të rënda ose vdekje. Shpresoj që njëra ose të dyja këto të jenë në dispozicion së shpejti.”

Duke folur për rolin e tij të ri në OBSH në një intervistë me “UnHerd”, Giesecke tha se mbulimi i medias në lidhje me përgjigjen e Suedisë ndaj pandemisë është bërë më i favorshëm që nga fillimi i vitit. “Atëherë ata menduan se ishim të çmendur”, citohet të ketë thënë ai.

Gjithashtu, ai tha se është shumë herët për të thënë nëse Suedia ka të drejtë me strategjinë e saj të koronavirusit: “Ju duhet të prisni një vit ose ndoshta pesë vjet përpara se të krahasoni strategjitë. Ne kemi ende një rrugë të gjatë për të bërë në këtë pandemi”.

Ende nuk dihet nëse mungesa e izolimit në Suedi do të jetë e efektshme për imunitetin e tufës.