Numri i vdekjeve nga shpërthimi i koronavirusit është rritur në 170 dhe një rast i konfirmuar në Tibet do të thotë se ka arritur në çdo rajon të Kinës.

Autoritetet kineze të shëndetit thanë që kishte 7,711 raste të konfirmuara në vend që nga 29 janari, raporton BBC.

Infeksionet janë përhapur edhe në të paktën 15 vende të tjera.

Organizata Botërore e Shëndetit (OBSH) do të takohet të enjten për të shqyrtuar përsëri nëse virusi përbën një emergjencë globale shëndetësore.

Vende të ndryshme kanë zbatuar plane evakuimi dhe karantine për shtetasit që duan të kthehen nga Kina, ku filloi shpërthimi I virusit në qytetin e Wuhan.

Rusia ka vendosur të mbyllë kufirin e saj lindor 4,300 km (2,670 milje) me Kinën, në përpjekje për të ndaluar përhapjen.

Drejtori i Përgjithshëm i OBSH-së Tedros Adhanom Ghebreyesus emëroi Gjermaninë, Vietnamin dhe Japoninë, si vende ku njerëzit kishin kapur virusin nga personat e tjerë që kishin vizituar Kinën.

"Megjithëse numrat e të prekurve jashtë Kinës janë ende relativisht të vogla, ata mbajnë potencialin për një shpërthim shumë më të madh," tha ai, duke shtuar se transmetimi nga njeriu-te-njeriu ishte një shqetësim.

Më shumë njerëz tani janë infektuar në Kinë sesa gjatë shpërthimit të Sars në fillim të viteve 2000, por numri i vdekjeve mbetet shumë më i ulët.

Sars, gjithashtu një koronavirus, shkaktoi sëmundje akute të frymëmarrjes.

Studiuesit po garojnë për të zhvilluar një vaksinë për të mbrojtur njerëzit nga virusi.

Një laborator në Kaliforni ka plane që një vaksinë e mundshme të hyjë në prova njerëzore deri në qershor ose korrik.