Rikthehet në skenë trilleri mes njeriut më të pasur në botë, Jeff Bezos dhe monarkut më të fuqishëm, sauditit Mohammed Bin Salman.

Mediat raportojnë se telefoni i Bezos është përgjuar në vitin 2018, pasi ai mori një mesazh malinj në Whatsapp nga princi i kurorës së Arabisë Saudite. Sipas Guardian, mesazhi që përmbante një kod malinj u dërgua më 1 maj 2018. Brenda pak orësh, një sasi e madhe të dhënash u vodh nga telefoni i Bezos.

Pak muaj më vonë, tabloidi ‘National Enquirer’ publikoi për herë të parë aferën e Bezos me gazetaren Lauren Sanchez.

Bezos akuzoi gazetën për shantazh dhe zhvatje, duke thënë se e kanë kërcënuar se do i publikojnë fotot nudo të tij dhe Sanchez.

Në një postim në atë kohë, Bezos hodhi dyshime për lidhjet e gazetës me Arabinë Saudite. Ai spekuloi se Arabia Saudite është tërbuar me të për shkak të mbulimit që po i bën gazeta e famshme ‘Washington Post’, në pronësi të Bezos, çështjes së vrasjes së gazetarit saudit Jamal Khashoggi, i cili punonte si kolumnist për ‘Washington Post’.

Edhe një raport i specialistëve të OKB arrin në përfundimin se telefoni i Bezos është hakeruar nga Arabia Saudite.

Në një reagim, Arabia Saudite i ka mohuar këto pretendime. Sipas tyre, këto lajme janë absurde.

Përveçse themelues i gjigandit Amazon, Bezos është pronar i gazetës Washington Post.

Ekspertët thonë se është lehtësisht e mundur që të hakerosh telefonat përmes mesazheve në Whatsapp.