Ali Agça deshi ta vriste Gjon Palin II më 13 maj 1981, ditë në të cilën Kisha kremton Dukjen e Zojës së Fatimës. Ishte ora 17.19. Papa përshkonte Sheshin e Shën Pjetrit me papamobil, para se të niste audiencën tradicionale të përgjithshme me besimtarët. Agça e qëlloi dy herë, duke e plagosur Papën, që u mbart urgjent në Spitalin Gemelli dhe iu nënshtrua menjëherë operacionit, që zgjati 6 orë.
Lutja e Gjon Palit II
Më 17 maj, vetëm pesë ditë pas atentatit, Papa i plagosur kremtonte lutjen e Engjëllit të Tënzot drejtpërdrejt nga dritarja e spitalit, për ata, që në këtë rast, qenë grumbulluar në Sheshin e Shën Pjetrit, si çdo të diel, me besim se do ta dëgjonin përsëri Papën e tyre të dashur. Duke iu drejtuar atyre, e sidomos, atij që deshi ta vriste, tha: “Lutem për vëllain, që më plagosi, të cilin e fal sinqerisht!”.
Papa në Fatima
I bindur se kishte shpëtuar nga vdekja e sigurt me ndërmjetësimin e Zojës së Fatimës, Gjon Pali II shtegtoi tri herë në Shenjtëroren portugeze: më 1982, një vit pas atentatit; në vitin 1991 dhe në vitin 2000. E, gjatë njërit nga këto shtegtime, ngërtheu në kurorën e Zojës së Fatimës, plumbin që ia pati përshkuar tej e ndanë trupin, pa i shkaktuar vdekjen, gjë që i çuditi mjekët, që e operuan në Spitalin romak Gemelli. E në sa i bënte këtë “dhuratë”, të çuditshme, Papa, që i shpëtoi mrekullisht plumbit të terroristit, iu drejtua Zojës me fjalët:
“E ja, pra, sot jam këtu. Erdha ta falënderoj Provaninë Hyjnore në këtë vend, të cilin Nëna e Zotit e ka shumë për zemër. ‘Misericordia Domini, quia non sumus consumpti”, përsëris edhe një herë me profetin”(Gjon Pali II, Homelia në Shenjtëroren e Zojës së Fatimës, Fatima, 13 maj 1982).
Guximi i faljes
Dje, Rai Premium do t’i kushtonte kësaj ngjarjeje programin “Guximi i faljes”: reflektim mbi domethënien e faljes së krishterë përmes një sërë intervistash. Do të flasin kardinali Giovanni Angelo Becciu, prefekt i Kongregatës për Çështjet e Shenjtorëve; Gianfranco Svidercoschi, ish zëvendës-drejtor i gazetës vatikanase “L’Osservatore Romano”, një vatikanist e një polic. Dokumentari do të ritransmetohet edhe më 29 dhjetor, në Rai Storia.
© SYRI.net