Nga Emma Jacobs - FT/

Puna e hidraulikut është e ardhmja. Të paktën kështu ka thënë Geoffrey Hinton, "babai i inteligjencës artificiale". "Punët që do t'i mbijetojnë inteligjencës artificiale për një kohë të gjatë janë ato ku duhet të jesh shumë i adaptueshëm dhe i aftë fizikisht, dhe puna e hidraulikut është pikërisht një punë e tillë."

Ai nuk është i vetmi që mendon kështu. Jensen Huang, drejtori ekzekutiv i prodhuesit të çipave Nvidia, i tha Channel Four News: "Nëse je elektricist, hidraulik apo marangoz, do të na duhen qindra mijëra të tillë për të ndërtuar të gjitha këto fabrika." Në SHBA, sipas Jobber, një kompani që ofron programe për profesionet teknike, kur u pyetën se cilat karriera duken më të sigurta nga automatizimi, më shumë se gjysma e prindërve përmendën hidraulikët, marangozët dhe elektricistët. Vetëm 18 për qind mendonin se zhvilluesit e softuerëve dhe 11 për qind kontabilistët janë profesione rezistente.

Hidraulikët janë kthyer në simbolin e karrierës në epokën e inteligjencës artificiale, ndërsa shumë njerëz po vënë në pikëpyetje vlerën e një diplome universitare, sidomos për shkak të borxheve studentore. Një grua më tha se, mes prindërve të klasës së mesme në zonën e saj, kjo temë ka filluar të zëvendësojë bisedat për çmimet e shtëpive, ndërsa fëmijët e tyre afrohen me moshën universitare dhe ata peshojnë vlerën e arsimit të lartë kundrejt një profesioni praktik. Hidrauliku i një fqinji mburrej se vëllai i tij ishte mjek, por vetëm njëri prej tyre kishte tre Porsche.

City & Guilds, që zotëron pothuajse tre të katërtat e tregut të kualifikimeve për hidraulikë në Angli, Uells dhe Irlandën e Veriut, raporton një rritje të ndjeshme të numrit të njerëzve që studiojnë për këtë profesion. Praktikat e përfunduara pothuajse u dyfishuan në 859 gjatë vitit deri në tetor 2025, ndërsa janë rritur edhe kualifikimet e tjera në këtë fushë.

Kjo nxitet nga shqetësimet "për kostot e larta të rrugëve tradicionale akademike dhe nga frika më e fundit se disa profesione mund të rrezikohen nga inteligjenca artificiale", sipas Salim Visram, menaxher i industrisë në këtë institucion trajnimi, megjithëse "kërkesa vazhdon të jetë më e madhe se oferta".

Megjithëse prindërit e klasës së mesme mund ta shohin hidraulikun si një karrierë të sigurt, a janë ata të gatshëm që fëmijët e tyre të heqin dorë nga universiteti dhe të hyjnë në profesione teknike? Kur politikanët ose komentuesit rekomandojnë që të rinjtë të bëhen hidraulikë apo elektricistë, zakonisht ata kanë parasysh fëmijët e dikujt tjetër.

Anketa e Jobber zbuloi se vetëm 7 për qind e prindërve do të preferonin që fëmija i tyre të ndiqte një profesion praktik ose program profesional. Jo vetëm që 71 për qind e të rinjve të Gjeneratës Z e shohin kolegjin profesional si më pak prestigjioz se universitetin, por edhe 63 për qind e prindërve të tyre mendojnë njësoj.

Kur Hannah Spencer, hidraulike 34-vjeçare, u bë deputete e Partisë së Gjelbër për Gorton dhe Denton, prezantuesi Jeremy Clarkson, i arsimuar në shkolla private dhe i kthyer nga gazetar automobilistik në fermer, shkroi për kufizimet e saj. "A mund ta imagjinoni atë në një takim për të vendosur të ardhmen e Ishujve Chagos… Do të ishte qesharake."

Një mjeke, e para në familjen e saj që shkoi në universitet, u habit nga reagimi i vet kur djali i saj vendosi të bëhej hidraulik, duke u ndjerë "çuditërisht fajtore", sikur përpjekjet e mëdha të prindërve të saj për ta ngritur socialisht dhe akademikisht ishin kthyer pas. "Sikur nuk po e vazhdoja përpara atë rrugë. A jam unë përjashtimi në udhëtimin më tradicional të familjes sime nga klasa punëtore?"

Louise Ashley, profesore e asociuar në Queen Mary University of London, e cila studion lëvizshmërinë sociale në firmat e shërbimeve profesionale, thotë se nëse "perceptimi shoqëror për këto profesione" tek klasa e mesme ndryshon, atëherë ata mund të zënë një "pjesë të madhe" të profesioneve teknike, nëse këto ofrojnë "pagesë shumë të mirë, autonomi dhe siguri në punë". Ajo shton se prindërit mund t'i drejtojnë fëmijët drejt niveleve më të specializuara të këtyre profesioneve. "Kjo mund të krijojë një lloj rrethi pozitiv, varet nga këndvështrimi; sa më shumë persona nga klasa e mesme të hyjnë në këto fusha, aq më shumë rritet prestigji i tyre shoqëror, duke i bërë më tërheqëse për familje të ngjashme dhe duke forcuar më tej statusin e tyre."

Kepler Ridge, i cili la profesionin e hidraulikut pas gjashtë vitesh për të përfunduar një diplomë në shkenca kompjuterike dhe tani ndjek studime pasuniversitare në biologji, thotë se puna e hidraulikut e ndihmoi të blinte shtëpinë e tij. "Po fitoja shumë mirë dhe nuk po hyja në borxhe për shkollën." Ai shton se puna e ndihmoi të përqendrohej dhe të menaxhonte ADHD-në. "Lëvizja vazhdimisht. Isha shumë aktiv dhe i përfshirë. Për njerëzit që e kanë të vështirë në klasat tradicionale, është një rrugë shumë e mirë."

Por ai paralajmëron kundër idesë se kushdo mund të merret me një profesion të specializuar dhe këshillon të jesh i përgatitur për pak pushime dhe orë të gjata pune. "Ishte jashtëzakonisht fizike. Në fund të çdo dite isha i rraskapitur. Shpesh doja vetëm të shkoja në shtëpi dhe të flija." / Financial Times – Syri.net