Meta ka njoftuar se ka hequr reklamat e disa firmave ligjore nga platformat e saj, të cilat synonin të tërhiqnin klientë për padi të ardhshme lidhur me varësinë nga rrjetet sociale.

Vendimi vjen në një moment të ndjeshëm për kompaninë, e cila së fundmi ka humbur dy procese të mëdha gjyqësore në SHBA. Njëri prej tyre ishte një gjyq historik në Kaliforni, ku një grua e re fitoi çështjen kundër Meta-s dhe YouTube për varësinë e saj nga rrjetet sociale gjatë fëmijërisë.

Në një deklaratë zyrtare, Meta u shpreh: Nuk do të lejojmë që avokatët të përfitojnë nga platformat tona ndërkohë që pretendojnë se ato janë të dëmshme.

Nga ana tjetër, reagimet nga firmat ligjore nuk kanë munguar. Emily Jeffcott, avokate në Morgan & Morgan, e kritikoi këtë veprim duke e cilësuar si një përpjekje për të shmangur përgjegjësinë. Sipas saj, kompania duhet të investojë më shumë në sigurinë e përdoruesve, sidomos për të parandaluar përdorimin problematik dhe për të identifikuar përdoruesit nën moshën 13 vjeç.

“Bllokimi i reklamave nuk i zhduk dëmet, por vetëm e vështirëson rrugën për viktimat”, theksoi ajo.

Sipas medias amerikane Axios, dhjetëra reklama nga kompani si Morgan & Morgan dhe Sokolove Law janë çaktivizuar. Këto reklama ishin të pranishme në Facebook, Instagram, Threads dhe në Audience Network, rrjeti i zgjeruar i reklamave të Meta-s.

Megjithatë, disa reklama rezultojnë ende aktive në bibliotekën e reklamave të kompanisë.

Meta thekson se, sipas politikave të saj, rezervon të drejtën të heqë reklama që cenojnë marrëdhënien me përdoruesit ose bien ndesh me interesat dhe filozofinë e saj të reklamimit.

Ndërkohë, zhvillimet ligjore vazhdojnë të rëndojnë mbi kompaninë. Në mars 2026, një gjykatë në New Mexico urdhëroi Meta-n të paguajë 375 milionë dollarë për mashtrimin e përdoruesve lidhur me sigurinë e fëmijëve në platformat e saj.

Në një tjetër rast në Kaliforni, një grua fitoi 6 milionë dollarë dëmshpërblim për varësinë e saj nga rrjetet sociale, me Meta-n që pritet të mbulojë 70% të shumës dhe Google pjesën tjetër.

Ndërkohë, Snap dhe TikTok, të përfshira fillimisht në padi, arritën marrëveshje jashtë gjykatës. Meta ka bërë të ditur se do t’i apelojë të dy vendimet dhe vijon të kundërshtojë përfundimet e gjykatave.