Studim i ri: Një në tre përgjigje të chatbot-eve të AI si Chat GPT dhe Perplexity përmban informacion të rremë

Një raport i fundit nga kompania amerikane e vlerësimit të lajmeve, NewsGuard, ka zbuluar se chatbot-et më të njohura të inteligjencës artificiale (IA), përfshirë modelet e OpenAI dhe Meta, përfshijnë informacion të rremë në çdo përgjigje të tretë.

Studimi analizoi 10 chatbot-et më të popullarizuara dhe zbuloi se modelet si ChatGPT i OpenAI dhe Llama i Meta-s përhapin gënjeshtra në rreth 40% të përgjigjeve të tyre, ndërsa Pi i Inflection AI dhe Perplexity AI shfaqin shkallë edhe më të lartë, me 57% dhe 47% respektivisht. Në anën tjetër, Claude i Anthropic dhe Gemini i Google treguan performancë më të mirë, me vetëm 10% dhe 17% të përgjigjeve që përmbanin informacion të rremë.

Rritja më dramatike e gënjeshtrave u vu re tek Perplexity, ku në vitin 2024 nuk u regjistrua asnjë pretendim i rremë, ndërsa në gusht 2025 ky numër arriti në 46%. Newsguard thekson se chatbot-et nuk refuzojnë më t’i përgjigjen pyetjeve edhe kur nuk kanë informacion të mjaftueshëm, gjë që kontribuon në përhapjen e dezinformatave.

Raporti gjithashtu zbuloi se disa chatbot citojnë burime të propagandës së huaj, duke përfshirë operacione të lidhura me ndikim rus si Storm-1516 dhe Pravda, duke përsëritur pretendime të rreme si ato mbi Kryetarin e Parlamentit moldav, Igor Grosu.

Edhe pse OpenAI dhe Google kanë njoftuar për versionet e reja të modeleve të tyre, të cilat premtojnë të jenë më të sigurta dhe të saktë, raporti tregon se chatbot-et vazhdojnë të dështojnë në fusha të njëjta si vitin e kaluar.

Studimi u krye duke vlerësuar përgjigjet e chatbot-eve ndaj 10 pretendimeve të rreme në tre stile pyetjesh: neutrale, kryesore dhe keqdashëse, duke matur nëse modeli e përsëriti ose e hodhi poshtë pretendimin. Sipas NewsGuard, chatbot-et përballen me boshllëqe të dhënash, dezinformim nga aktorë të keqdashëm dhe sfida për t’u përballur me ngjarjet më të fundit, duke çuar në rritjen e gënjeshtrave krahasuar me vitin 2024.