Si ta parandaloni mbinxehjen e telefonit gjatë valëve të nxehtësisë së verës

Ka disa gjëra që mund të bëni për të mbrojtur pajisjen tuaj nga nxehtësia e lartë.

Pushimet verore kanë mbërritur dhe shumë prej nesh do të nisen për udhëtime në destinacione të nxehta dhe me diell - duke marrë me vete edhe pajisjet elektronike.

Por, ndërsa vendet e Evropës Jugore si Spanja, Italia dhe Greqia vuajnë nga dielli, mos harroni se telefonat, tabletët dhe pajisjet e tjera elektronike janë të ndjeshme ndaj nxehtësisë ekstreme.

Ja çfarë thonë prodhuesit e pajisjeve dhe ekspertët për mbajtjen e pajisjeve tuaja elektronike të freskëta.

Çfarë i shkakton nxehtësia një telefoni

Shumica e pajisjeve elektronike funksionojnë më mirë në një diapazon specifik të temperaturave. Apple thotë se iPhone dhe iPad janë projektuar për t'u përdorur në temperatura, midis 0 dhe 35 gradë Celsius.

Apple paralajmëron se një pajisje mund të ndryshojë sjelljen e saj për t'u përballur me temperatura ekstreme: "Përdorimi i një pajisjeje iOS ose iPadOS në kushte shumë të nxehta mund ta shkurtojë përgjithmonë jetëgjatësinë e baterisë".

Telefoni juaj mund të ngrohet përkohësisht nëse po e karikoni pa tel, po shkarkoni skedarë të mëdhenj, po transmetoni video me cilësi të lartë ose po bëni ndonjë gjë tjetër që kërkon shumë energji ose të dhëna.

Samsung thotë se kjo është normale dhe nuk do të ndikojë në performancën ose jetëgjatësinë e baterisë.

Çfarë ndodh nëse pajisja nxehet shumë

Nëse telefoni juaj nxehet aq shumë sa bëhet i pakëndshëm për ta mbajtur, Samsung rekomandon që të mos e përdorni më.

Një iPhone që mbinxehet do t'i njoftojë përdoruesit me një mesazh paralajmërues se duhet të ftohet përpara se të mund të përdoret. Pajisjet Android do të shfaqin një mesazh të ngjashëm, duke u thënë përdoruesve se ekrani do të errësohet, aplikacionet do të mbyllen dhe karikimi do të ndalet.

Çfarë nuk duhet bërë

Ka disa gjëra që mund të bëni për të mbrojtur pajisjen tuaj nga nxehtësia e lartë.

Mos e lini në makinë në një ditë të nxehtë dhe mos e lini në rrezet e diellit direkte për një kohë të gjatë.

Apple gjithashtu paralajmëron kundër përdorimit të disa veçorive kur është shumë nxehtë ose në rrezet e diellit direkt për periudha të gjata, si navigimi GPS gjatë drejtimit të makinës, gjatë lojës së një loje video me shumë grafikë ose gjatë përdorimit të kamerës.

Google, që prodhon telefonat Pixel Android, këshillon përdoruesit të mos përdorin veçori ose aplikacione që kërkojnë shumë burime gjatë karikimit.

Mbajini pajisjet tuaja të freskëta

Gjëja më e mirë që mund të bëni në vapë ekstreme është ta fikni plotësisht pajisjen.

«Edhe proceset në sfond mund të gjenerojnë nxehtësi», thonë ekspertët në zinxhirin britanik të pajisjeve elektronike Curry's.

"Një mbyllje e plotë e ndihmon atë të ftohet më shpejt".

Hiqeni mbulesën, nëse telefoni ose tableti juaj ka një të tillë, sepse ato mund të bllokojnë nxehtësinë.

Gjithashtu, mbajeni larg rrezeve të diellit dhe vendoseni në një vend të freskët, si një dhomë me ajër të kondicionuar ose përpara një ventilatori. Por kini kujdes kur e vendosni në vende të freskëta.

“Mos e vendosni kurrë pajisjen tuaj në frigorifer ose në ngrirje, pasi kondensimi mund të shkaktojë dëmtime nga uji”, sipas Curry's./ Euronews.