'Ka ushqyer 'iluzionet' e përdoruesve'/ OpenAI ridizajnon ChatGPT për të zbuluar më mirë shqetësimet mendore

OpenAI ka njoftuar ndryshime të rëndësishme në mënyrën se si funksionon ChatGPT, me synimin për ta bërë chatbot-in më të ndjeshëm ndaj shenjave të shqetësimit mendor ose emocional. Kompania pranon se mjeti i saj i inteligjencës artificiale nuk ka arritur gjithmonë të njohë situata të rrezikshme, përfshirë raste kur përdorues vulnerabël janë ndikuar negativisht nga përgjigjet e tij.

ChatGPT do të marrë masa të reja mbrojtëse, përfshirë rekomandime për pushime gjatë bisedave të gjata dhe shmangien e përgjigjeve direkte për pyetje me rrezik të lartë emocional, si ato që lidhen me ndarje apo vendime jetësore. Në vend të kësaj, chatboti do të ndihmojë përdoruesit të reflektojnë dhe do t’i drejtojë drejt burimeve profesionale kur është e nevojshme.

Për të garantuar një qasje më të përgjegjshme, OpenAI po krijon një grup këshillimor ekspertësh në fushën e shëndetit mendor, zhvillimit të të rinjve dhe ndërveprimit njeri-kompjuter. Kompania thekson se ChatGPT nuk mund të zëvendësojë terapinë profesionale, por mund të jetë një ndihmë në situata të përditshme ku njerëzit ndihen të bllokuar ose të mbingarkuar.

“Kjo është një fushë ku duhet të përmirësohemi dhe do të mësojmë nga përdorimi real”, tha OpenAI në deklaratën zyrtare.