Numri i të vdekurve nga tërmeti i fuqishëm i Meksikës është rritur në 273 persona, ndërkohë ekipet e shpëtimit garojnë kundër kohës për të arritur tek të mbijetuarit e bllokuar.
Presidenti Enrique Peña Nieto tha se shpëtimi dhe gjetja e atyre që u plagosën nga tërmeti 7.1 ballësh të martën do të mbetet "përparësia më e madhe".
Tërmeti rrëzoi dhjetëra ndërtesa dhe la miliona banorë të kryeqytetit meksikan pa energji elektrike.
Ekipet e shpëtimit besojnë se shumë qytetarë mund të jenë ende të bllokuar në 10 ndërtesa , vetëm në Mexico City.
Bilanci i vdekjeve u njoftua sot nga shefi i shërbimeve emergjente të Meksikës dhe zyra e presidentit./SYRI.net/
Ndërkohë mes godinave të shembura është një shkollë fillore në jug të kryeqytetit, ku mbetën të vrarë të paktën 21 fëmijë dhe 4 të rritur. I gjithë vendi po mban frymën në pritje të lajmeve të mira, për dhjetëra të zhdukurit.
Lokalizimi i një 8-vjeçareje të gjallë në rrënojat e shkollës, ka shtuar shpresat për të mbijetuar të tjerë. Ndërkohë CNN ka publikuar një video rrëqethëse ku tregon momentin që forcat e shpëtimit nxjerrin fëmijët nga rrënojat e shkollës së shembur.
Përmasat e tragjedisë bëhen më të qarta me kalimin e orëve, e siç u raportua gjatë mbrëmjes së djeshme, shembja e një kishe në shtetin e Pueblos, i mori jetën 7 të rriturve e 4 fëmijëve./SYRI.net/
© SYRI.net