Politikanë dhe krerë të kompanisë së gazit morën pjesë në prezantimin zyrtar të depozitës më të madhe të gazit të zbuluar në vend në tre dekada - ndërsa Rumania përpiqet të bëhet qendër rajonale e energjisë.

Kompania energjetike Rumune Romgaz përuroi të enjten depozitën më të madhe të zbuluar në tre dekada në tokën Rumune me pjesëmarrjen e kryeministrit Sorin Grindeanu dhe kreun e partisë Social Demokrate në pushtet Liviu Dragnea.

Romgaz, kompania më fitimprurëse shtetërore, njoftoi zbulimin e depozitës që vlerësohet se mban 150-170 milionë boe – fuçi ekujvalente të naftës – në Karagea, konteja Buzau, verilindje e Bukureshtit në qershor 2016.

Depozita e re pritet të përmirësojë perspektivën e kompanisë pasi fitimet e saj neto ranë më 2016 me 14 për qind, për shkak të importeve më të larta, kërkesës më të ulët për gaz në sektorët kyçë dhe një rënie botërore e çmimeve të gazit.

Prodhimi ra gjithashtu me 25 për qind ndërsa shitjet ranë me 17 për qind.

Kompania e gazit, bashkë me kompaninë austriake OMV Petrom, kontrollojnë pothuajse të gjithë prodhimin e gazit në Rumani. Sipas ROmgaz, kompania do të vijojë të eksplorojë shtatë vende të tjera në tokë.

OMV Petrom, prodhuesi më i madh i gazit dhe naftës në Europën Juglindore, bashkë me kompaninë Romanian Hunt Oil filluan gjithashtu vitin e kaluar shfrytëzimin eksperimental të një depozite gazi e cila gjendet gjithashtu në rajonin Buzau, ku janë investuar 17 milionë euro.

Përgjatë viteve të ardhshme, Rumania pritet të fillojë shfrytëzimin e gazit edhe në dy vende në Detin e Zi. Black Sea Oil&Gas, një kompani me bazë në Rumani pritet të fillojë shfrytëzimin komercial më 2018. Kompania amerikane Exxon dhe kompania më e madhe Rumune OMV Petrom do të pasojnë më 2020.

Për të lehtësuar nxjerrjen e gazit natyror nga Deti i Zi, vendi do të fillojë edhe ndërtimin e BRUA [Bullgari-Rumani-Hungari-Austri], një projekt gazsjellësi punimet për të cilin do të nisin në fund të vitit. Punimet pritet të përfundojnë më 2019.

Sipas ministrit të Energjisë Toma Petcu, sapo të fillojë shfrytëzimi i burimeve në det, Rumania mund të bëhet një lojtar rajonal në sektorin e energjisë. Rumania zë gati 80 për qind të të gjithë gazit natyror të prodhuar në Europën Juglindore.