Pas shume ditësh në luftë për shuarjen e zjarreve qyteti i Shëngjinit është gdhirë i qetë këtë mëngjes. Qindra trupa të ushtrisë, emergjencave civile, bashkive dhe dy avione italianë dominuan zjarret që rrethuan qytetin në të gjitha anët. Për fat të mirë nuk pati viktima në njerëz por qyteti në kulmin e sezonit turistik u zbraz nga vizitorët të cilët janë kryesisht shqiptarë nga Kosova.
Përgjatë orëve të mbasditës se djeshme dhe natës mijëra turistë lanë hotelet në plazhet e Ranës se Hedhun dhe hotelet në qytet. Rruga dalëse e qytetit u përfshi në kaos nga ikjet në panik të turistëve dhe mjeteve të zjarrfikëseve dhe ambulancave që hynin në qytet për të luftuar me flaket.
Gati 60 për qind e turisteve janë larguar gjatë natës duke e lenë qytetin të zbrazur. Shumë prej tyre janë të indinjuar sepse kishin bërë pagesat dhe kanë ikur me shpejtësi pa ditur se si do të bëhen rimbursimet. Sakaq një pjesë e madhe e kurorës me pisha mbi qyet u dogj dhe gjithashtu pylli në brigjet e Ranës se Hedhun një nga me të bukurat e bregut ranor në vend. Vendasit besojnë se zjarri është vëne me dashje fillimisht në zonën e Ranës se Hedhun dhe me pas u përhap dhe doli jashtë kontrollit nga erërat e forta. Të tjerë besojnë se zjarret janë një sabotim që po i behët zhvillimit të turizmit në qytet.
Megjithëse qyteti ishte në prag të katastrofës, dëmet e mëdha në banesa dhe në njerëz u shmangen, por sakaq është shkrumbuar e gjithë kurora e gjelbër në kodrat pranë detit që zbukuronte peizazhin po aq sa deti.
Zjarri fillimisht ishte i lokalizuar në kodrat mbi repartin ushtarak pranë disa banesave dhe hoteleve pjesë e Ranës se Hedhun. Një helikopter dhe shumë zjarrfikëse nuk mundën të dominonin situatën nga erërat e forta të veriut. Në më pak se dy orë zjarri u përhap në të gjithë kodrën mbi qytet shumë afër banesave.
Në orën 17 të mbasditës së djeshme situata u bë kaotike ku tymi mbuloi qytetin dhe zjarri mbërriti në shtëpitë mbi rrugë. Dy avionë italianë ishin vendimtarë për frenimin e zjarrit që gati sa nuk shkrumboi një qytet të terë.
Shëngjini prej më shumë se 15 vitesh është shndërruar destinacioni kryesor i pushuesve nga Kosova. Duke qenë destinacioni më i afërt me Kosovën qyteti ka pësuar një zhvillim të madh vitet e fundit. Në ndryshim nga qytetet e tjera turistike Shëngjini ka investuar në infrastrukturë dhe ka një menaxhim shumë të mirë të trafikut të mjeteve, lëvizjes së njerëzve dhe menaxhimit të mbetjeve.
Qyteti po zgjerohet me hotele në dy periferitë e tij. Nga jugu drejt Kunës janë ndërtuar hotele të nivelit mbi mesataren me 4 dhe 5 yje, ndërsa në zonën e Ranës së Hedhun ka një projekt për të ndërtuar resorte luksoze.
Shëngjini ka një oferte diverse për shume nivele, duke ofruar çmime shumë ekonomike si në hotele dhe restorante ashtu edhe shërbime luksi.
Këtë vit zjarri ka dëmtuar rëndë turizmin në kulmin e tij..MONITOR
© SYRI.net
Denonco
Merrni lajmet më të fundit nga SYRI.net në çdo moment dhe kudo që të jeni!
Botoxi dhe frika e re: a mund të ndikojë në tru?
Kushtet socioekonomike të një fëmije ndikojnë në funksionin e trurit të tyre
Shtatë arsye madhore për të ngrënë fiq sa më shpesh, si ndikojnë në shëndet