Leipzig është skuadra e parë gjysmëfinaliste e Europa League.
Nënkampionët e Gjermanisë fituan 0-2 në Bergamo përballë Atalantës dhe kaluan në katër më të mirat e turneut falë rezultatit të përgjithshëm 3-1.
Berat Gjimshiti në stol, teksa dy skuadrat e nisën në sulm sfidën e luajtur në “Gewiss Stadium”.
Davide Zappacosta rrezikoi për vendasit, por golin e gjeti ekipi gjerman në minutën e 18-të.
Dalje e bukur në krahun e djathtë nga ana e Konrad Laimer, austriaku dhuroi një asist për Christopher Nkunku, i cili dërgoi lehtësisht topin në rrjetë.
Atalanta tentoi të reagonte, por pa rrezikuar portën kundërshtare.
Laimer iu afrua golit për Leipzigun në fundin e pjesës së parë, ndërsa fraksioni i dytë nisi me një pretendim të zikaltërve italianë për penallti.
Goditja e dënimit e Ruslan Malinkovskit (50’) u ndal në dorën e Dani Olmos, por kryesori spanjoll, Antonio Mateu Lahoz, vijoi lojën pasi pa rastin në VAR.
Atalanta u hodh në sulm në kërkim të barazimit, por skuadra gjermane fitoi një penallti tre minuta përpara fundit, të cilën francezi Nkunku u ktheu në gol.
Shtatë minutat shtesë nuk sollën asgjë dhe Leipzig pret fituesin e çiftit Braga-Rangers për në gjysmëfinale.
© SYRI.net
Bëje LIKE dhe merr lajmin e fundit nga Sporti: