Hamiti: Pushteti politik nuk guxon t’i thotë prokurorisë 'dorëzohu', kjo është vepër penale

08:36, 11/02/2023

Anëtari i kryesisë së LDK-së, Muhamet Hamiti, ka reaguar ndaj deklaratës së ministres Albulena Haxhiu, ku kjo e fundit ka kërkuar nga prokurori të dorëzohet, për rastin ku Haxhiu dhe disa deputet po akuzohen për hedhje të gazit lotësjellës.

Hamiti në Facebook ka thënë se po të ndodhte ajo se çfarë po kërkon Haxhiu do të të krijohej precedent i rrezikshëm, përcjell Syri.net Kosova

Pasi sipas tij, do të përligjej përdorimi i gazit lotsjellës prej kujtdo në Kuvend për çfarëdo ‘kauze’ që zgjedh ai/ajo.

“Po qe se do të ndodhte kjo, siç po kërkon Ministresha e Drejtësisë, do të krijohej precedent i rrezikshëm. Do të përligjej përdorimi i gazit lotsjellës prej kujtdo në Kuvend për çfarëdo ‘kauze’ që zgjedh ai/ajo. Arsenali i dhunës politike do të zgjerohej dhe legjitimohej. Prej vendit ku flitet, ku kuvendohet, Kuvendi i Republikës së Kosovës do të kthehej në një fushëbetejë. S’do të ishte Kuvend më.”, ka shkruar ai.

Hamiti, tutje ka thënë se gjyqësori i Kosovës nuk guxon të dorëzohet siç kërkon ministrja Haxhiu.

“Gjyqësori i Kosovës s’guxon të dorëzohet, siç po kërkon Ministresha Haxhiu. Shkurt e shqip: pushteti politik nuk guxon t’i thotë prokurorisë: dorëzohu! Kjo është vepër penale.”, ka përfunduar ai.

© SYRI.net

Lexo edhe:

• Ngrihet aktakuzë ndaj 23 personave për mashtrim në një Call Center
• ZPS-ja refuzon të përgjigjet nëse i arrestuari për spiunazh është dëshmitar në Hagë
• S’kalojnë projektligjet në Komisionin për integrim, opozita thotë se s’janë në përputhje me legjislacionin e BE-së