Kuvendi mban dy seanca këtë javë, në njërën prej tyre diskutohet për vlerën e koeficientit

12:22, 06/02/2023

Shefja e Grupit Parlamentar të VV-së, Mimoza Kusari-Lila ka bërë të ditur se këtë javë do të mbahen dy seanca, njëra të mërkurën ndërsa tjetra të enjten, e cila në rend dite do ta ketë shqyrtimin e parë të projektligjit për ndarjet buxhetore ku do të diskutohet për vlerën e koeficientit.

Kuvendi i Kosovës këtë javë do të mbajë dy seanca.

Kështu ka bërë të ditur shefja e grupit parlamentar të Vetëvendosjes (VV), Mimoza Kusari-Lila pas mbledhjes së kryesisë së Kuvendit.

Kusari-Lila ka bërë të ditur se seanca e parë do të mbahet të mërkurën e 8 shkurtit duke filluar në ora 12:00 dhe në rend dite do të ketë shqyrtimin e pikave të papërfunduara të seancave të kaluara.

Ndërsa të enjten e 9 shkurtit do të mbahet seancë plenare në ora 10:00 ku në rend dite do të ketë një mori votimesh, në mesin e shumë pikave do të jetë edhe shqyrtimi i parë i projektligjit për ndarjet buxhetore ku do të diskutohet për vlerën e koeficientit që është përcaktuar nga Qeveria e Kosovës të mërkurën e 1 shkurtit.

Kryeministri i Kosovës, Albin Kurti, gjatë mbledhjes së Qeverisë kishte bërë të ditur se vlera e koeficientit për vitin 2023 do të jetë 105.

Ndër të tjera, Kusari-Lila në këtë konferencë për media ka shprehur ngushëllime për viktimat që kanë humbur jetën në tërmetin e fuqishëm që ka goditur Turqinë dhe Sirinë.

© SYRI.net

Lexo edhe:

• “Hapat e ardhshëm të Kosovës për anëtarësim në KiE”, MPJ e Gjermanisë deklarohet për takimin me Kurtin
• “Gruaja e tij merr fonde nga Serbia”, DASh demanton dyshimet e ngritura ndaj Escobarit
• Analiza e institutit të njohur amerikan: Rama është Erdogani i ri, po përdor drejtësinë për të goditur opozitën