Haradinaj: Kosova nuk e ka komoditetin të bëjë eksperimente

11:53, 01/08/2022

Kryetari i Aleancës për Ardhmërinë e Kosovës, njëherësh dhe deputet, Ramush Haradinaj, thotë se Kosova nuk e ka komoditetin të bëjë eksperimente.

Sipas tij, operacionet e sigurisë për shtrirjen e sovranitetit, duhet të studiohen, të analizohen e të shpjegohen mirë.

“Çdo veprim i lënë në gjysmë të rrugës, siç ishte ai i mbrëmshmi, është humbje për Kosovën. Zbatimi i rendit dhe ligjit është i pa alternativë dhe duhet të bëhet në konsultim të ngushtë me aleatët e sigurisë”, tha Haradinaj.

Kreu i AAK-së theksoi se afati prej 30 ditësh për zbatimin e reciprocitetit duhet të shfrytëzohet me shumë seriozitet.

“Shteti i Kosovës nuk dobësohet vetëm nga bandat kriminale në veri, por edhe nga të paditurit e praktikantët në qeveri. Kushtetuta e vendit është më e fortë sesa kriminelët në veri, e të paditurit e praktikantët në qeveri. Qeveri, nëse hala je qeveri, voto ligjet e forcoje Policinë, ligjn për paga dhe ligjet për sigurim shëndetësor e pensional. Nëse s’je qeveri, do të shihet me 31 gusht”, theksoi Haradinaj.

Qeveria e Kosovës mbrëmë ka shtyrë për 30 ditë zbatimin e masës së reciprocitetit.

Ambasadori amerikan në Kosovë, Jeffrey Hovenier, i ka kërkuar Qeverisë që të shtyjë për 30 ditë zbatimin e vendimeve për targat dhe dokumentet serbe. Ai i ka bërë këto deklarata pasi serbët lokalë në veri të Kosovës kanë bllokuar me kamionë dhe me mjete tjera, rrugët që çojnë drejt dy pikëkalimeve kufitare që lidhin Kosovën dhe Serbinë – Jarinjë dhe Bërnjak.

© SYRI.net

Lexo edhe:

• Ndërmjetës nga vendi ku nisi shpërbërja e Jugosllavisë, Pahor rrugës për të qenë pasardhësi i Lajçakut
• Ymeri: Mospranimi i Kosovës në KiE është dështim i qeverisë
• Konjufca reagon për takimin Taravari-Mickoski: S’jam i informuar, por Siljanovska e VMRO-s ka koncepte antishqiptare