Asamblistët e partive të Kuvendit Komunal të Prishtinës, gjatë javës së kaluar u morën vesh që të në mbledhjen e ardhshme të Kuvendit Komunal, ekzekutivi të sjell rregulloren e re të punës së bizneseve.
Sipas kësaj rregullore, e diela do të jetë pushim për të gjitha bizneset në kryeqytet.
Shoqata për Mbrojtjen e Konsumatorëve ngrit shqetësimin se ky veprim i Komunës së Prishtinës nuk është i mirë pasi që ndikon në uljen e punës së bizneseve.
Kryetari i kësaj shoqate, Selatin Kaçaniku, në një përgjigje dhënë për arbresh.info thotë se komuna duhet të sigurojë zbatimin e ligjit të punës dhe jo të krijojë ligje të reja ngase sipas tij bizneset e caktuara duhet të punojnë edhe të dielave.
“Nëse është qëllimi për rregullimin e orareve të punës dhe eksploatimi i punëtorëve, komuna duhet që përmes inspektoratit te punës që e ka në kuadër të saj, të bëjë që bizneset ta respektojnë orarin e punës dhe ligjin e punëtoreve, por jo duke i kufizuar bizneset”, deklaroi ai.
Ndryshe, në disa komuna tashmë është rregulluar puna e bizneseve ditën e diel, derisa në disa të tjera është diskutuar, por ende nuk ka një vendim të prerë në lidhje me pushimin e të dielës.
© SYRI.net