Turizmi në gjendje të rëndë, kërkohet ndihma e shtetit

17:21, 02/01/2021

Pandemia COVID-19, si dhe masat që ka marrë vendi ynë për mbrojtje ndaj pandemisë, ka bërë që 2020 të jetë njëri ndër vitet më të vështirë në sektorin e turizmit në Kosovë.

Kryetari i Unionit të Turizmit në Kosovë, Baki Hoti, ka thënë se pandemia në vitin 2020, ka bllokuar të gjitha aktivitetet e sektorit të turizmit dhe se Qeverisa e Kosovës nuk ka bërë asgjë për ta ndihmuar këtë sektor, i cili është shtylla kryesore e ekonomisë së Kosovës.

“Pandemia ka kufizuar shumë elementet, të cilat zhvillohen gjatë vitit në pjesën e turizmit, njëkohësisht ka ndërprerë mos të them qind për qind, por 90 për qind ka ndërprerë pjesën e grupeve ose vizitorëve në Kosovë. Institucionet nuk kanë qenë mbështetës të këtij pavarësisht insistimeve në këtë sektor, takimeve, diskutimeve, debateve, kërkesave që unioni ka bërë, ende nuk kemi diçka konkrete se çka kërkohet nga komuniteti i turizmit, duke e pasur parasysh që turizmi është njëra nga shtyllat kryesore të ekonomisë së këtij vendi”.

Hoti ka thënë se ndihmat e ndara për punëtorët dhe bizneset janë të pamjaftueshme për sektorin e turizmit, pasi nevojiten pako konkrete që do të ndihmonin bizneset me qëllim të përballimit sa më të lehtë të pandemisë.

Ai kërkon nga Qeveria e Kosovës të ndihmojë më shumë turizmin për shkak të gjendjes jo të mirë në të cilin ndodhet ky sektor.

“Nuk ka pasur ndihma të mjaftueshme duhet të ketë pako konkrete. Vija buxhetore konkrete, të cilat do të tregojnë çfarë t’i ndihmojnë komunitetit të biznesit për shkak se në këtë sektor janë të përfshira hotelet, pjesa e gastronomisë, transporti, guidat dhe veprimtari të tjera. Turizmi është njëra ndër shtyllat kryesore të këtij vendi dhe institucionet, por edhe qeveria më në fund duhet t’i kthejë sytë nga turizmi dhe ta vlerësojë dhe ta dinë rolin e turizmit. Është momenti që institucionet ta ndihmojnë turizmin për shkak se ndodhet në gjendje të keqe. Është për keqardhje nëse sot e gjen një hotel me 60-70 dhoma në mes të kryeqytetit dhe e gjen të mbyllur. Ky është një dëm tepër i madh”, ka thënë Hoti për Kosovapress.

Ndryshe, Unioni i Turizmit në Kosovë, gjatë kohës së pandemisë është munduar t’i ndihmojë komunitetit të turizmit, ku kanë arritur që t’i nënshkruajnë tri marrëveshje ndërkombëtare dhe 19 marrëveshje të ndryshme, me institucione të ndryshme të cilat me kalim të pandemisë të jenë gati të implementohen ato.

Tjetër marrëveshje gjatë kësaj kohë është edhe marrëveshja ndërkombëtare që është bërë me Unionin e Turizmit të Shqipërisë, ku janë mbajtur dy aktivitete në kuadër të kësaj marrëveshje./kp/

© SYRI.net

Lexo edhe:

• Çmimi i drithit të importuar me ulje 42%, po buka nuk ndryshon
• Çfarë po ndodh sot me monedhat e huaja? Ja me sa po blihen dhe shiten dollari dhe euro
• Dogana e Kosovës shënon rekord të ri, të hyrat tejkalojnë vlerën e 500 milionë eurove