Dy agjentët spanjollë të arrestuar transmetuan informacione sekrete në SHBA

08:42, 06/12/2023

Dy agjentët dyshohet se i dhanë Uashingtonit të dhëna operacionale të klasifikuara si të nivelit më të lartë.

Një gjykatë në Madrid ka hapur një hetim ndaj dy agjentëve të Qendrës Kombëtare të Inteligjencës të Spanjës të dyshuar se kanë kaluar informacion sekret në Shtetet e Bashkuara, tha të hënën Ministri i Mbrojtjes i vendit.

Ata u arrestuan shtatorin e kaluar dhe u dërguan në burg, pasi u nxorën para një gjykatësi, konfirmoi e përditshmja spanjolle El Confidencial.

Ministrja e Mbrojtjes Margarita Robles tha se vetë agjencia e shërbimit sekret kishte paraqitur një ankesë në gjykatë. Margarita Robles, e cila po vizitonte një bazë ushtarake në Letoni, nuk pranoi të jepte hollësi të mëtejshme.

Ajo që dihet deri më tani është se ata që janë nën hetim dyshohet se i kanë ofruar Uashingtonit të dhëna operacionale të klasifikuara në nivelin më të lartë.

Qendra vuri re se dy nga agjentët e saj po merreshin me informacione që nuk kishin lidhje me detyrat që u ishin caktuar.

Vjedhja e dokumenteve të klasifikuara më pas u zbulua gjatë një prej kontrolleve të rregullta të Qendrës ndaj personelit të saj.

Nuk dihet ende se sa informacione mund t'u ketë kaluar agjentëve amerikanë, por hetimi ka zbuluar se informacioni është shkëmbyer me para.

Gjyqtari hetues vendosi t'i dërgonte direkt në burg për të parandaluar asgjësimin e provave.

Njëri prej të arrestuarve mbetet në burg, pasi mësohet se ka luajtur një rol më të spikatur, ndërsa tjetri është liruar me kusht.

Kodi Penal spanjoll dënon çdo spanjoll që zbulon informacione të klasifikuara me qëllim favorizimin e një fuqie të huaj me gjashtë deri në dymbëdhjetë vjet burg.

Gazeta El Confidencial tha se këto arrestime "do të kishin provokuar një krizë me Uashingtonin, megjithëse qeveria e Pedro Sanchez është përpjekur ta mbajë qetë"./ar.sh/SYRI.NET

© SYRI.net

Lexo edhe:

• 'Do zhvillojmë një tubim të madh!'/ Trump njofton rikthimin e bujshëm në vendin ku i shpëtoi atentatit
• Tërmet i fortë godet Greqinë
• G20/ Ministrat e financave diskutojnë taksën globale për super të pasurit