Italia ofron 30 milionë euro për të mbrojtur punëtorët nga zhvillimi i AI

10:33, 16/05/2023

Italia ka ofruar 30 milionë euro për të përmirësuar aftësitë e të papunëve, si dhe të punëtorëve, vendet e punës të të cilëve mund të jenë në rrezik për shkak të zhvillimit të shpejtë të automatizimit dhe inteligjencës artificiale.

Një agjenci, Fondo per la Repubblica Digitale (FRD), u krijua në vitin 2021 nga qeveria italiane me mandat për të forcuar aftësitë dixhitale të italianëve. Sipas këtij shërbimi, 54% e italianëve të moshës 16 deri në 74 vjeç kanë mungesë të aftësive bazë dixhitale, krahasuar me një mesatare prej 46% në Bashkimin Europian.

Financimi për përmirësimin e arsimit do të ndahet në dy mënyra, shpjegoi FRD.

Dhjetë milionë euro do të ndahen për përmirësimin e atyre vendeve të punës me rrezik të lartë për t’u zëvendësuar nga automatizimi dhe inovacionet teknologjike.

20 milionë eurot e mbetura do të caktohen për të ndihmuar të papunët dhe personat ekonomikisht joaktivë me qëllim zhvillimin e aftësive dixhitale që do të përmirësojnë shanset e tyre për të hyrë në tregun e punës, tha FRD.

Një gamë e gjerë vendesh pune mund të kërcënohet nga automatizimi, vuri në dukje agjencia. Agjencia përmendi industri të tilla si transporti, logjistika, administrata, shërbimet e kontabilitetit, punë të tjera në industrinë e shërbimeve administrative.

Përhapja e shpejtë e Inteligjencës Artificiale (AI) dhe automatizimi dhe zhvillimi i shpejtë i mjeteve të tilla si ChatGPT kanë tërhequr vëmendjen e parlamentarëve dhe rregullatorëve në shumë vende.

Shumë ekspertë thonë se nevojiten rregulla të reja për të qeverisur Inteligjencën Artificiale për shkak të ndikimit të saj të mundshëm instrumental në sigurinë kombëtare, arsimin dhe vendet e punës.

ChatGPT nuk ishte i aksesueshëm në Itali për rreth katër javë derisa kompania që krijoi këtë mjet të ri, OpenAI, rregulloi problemet e ngritura nga Autoriteti Italian i Mbrojtjes së të Dhënave në fund të prillit.

© SYRI.net

Lexo edhe:

• Xi Jinping në Europë pas 5 vitesh, vizitë edhe në Serbi! CNN: Pse turi i presidentit kinez do të jetë një 'luftë e vështirë'
• REL/ Përballja Biden-Trump, historike në shumëçka
• Frikë për sulme, SHBA apel qytetarëve të saj: Bëni kujdes në Gjermani