Kompania amë e Facebook-ut është e shqetësuar se nëse ShBA dhe BE nuk arrijnë një marrëveshje të re për transferimin e të dhënave, e ardhmja e operacioneve të saj evropiane është në rrezik.
Kompania amë e Facebook, Meta, ka paralajmëruar se mund t’i duhet t’i tërheqë produktet dhe shërbimet, përfshirë Facebookun dhe Instagramin, nga Evropa nëse pengohet t’i transferojë të dhëna nga BE në ShBA për shkak të mungesës së një marrëveshjeje ndërkombëtare.
Paralajmërimi, i lëshuar në raportin e tij vjetor javën e kaluar, u pasua nga një deklaratë nga një zëdhënës i Meta-s të hënën që u bëri thirrje dy fuqive të vendosin “rregulla të qarta globale për t’i mbrojtur rrjedhat e të dhënave transatlantike në afat të gjatë”.
Evropa ka ligje të rrepta për privatësinë që ofrojnë mbrojtje për përdoruesit e internetit në të gjithë Bashkimin Evropian, por kjo përbën një problem për kompanitë e teknologjisë amerikane, të tilla si Meta. Këto kompani mbështeten në marrëveshjet ndërkombëtare të transferimit të të dhënave për t’i transferuar, ruajtur dhe përpunuar të dhëna në qendrat e tyre të të dhënave në ShBA. Por për shkak se ShBA nuk ofron mbrojtje adekuate për qytetarët e BE-së kundër përgjimeve nga qeveria, marrëveshja më e fundit e transferimit të të dhënave midis BE-së dhe ShBA-së u shpall e pavlefshme në korrik të vitit 2020 nga një gjykatë e lartë evropiane.
Transferimet e të dhënave janë lejuar të vazhdojnë ndërkohë që një marrëveshje e re është arritur falë një mekanizmi të njohur si klauzola standarde kontraktuale. Por edhe ky proces është në rrezik, për shkak të një vendimi të agjencisë irlandeze të mbrojtjes së të dhënave në gusht të vitit 2020. Një vendim final mbi ligjshmërinë e përdorimit të klauzolave standarde kontraktuale për transferimet e të dhënave pritet në muajt në vijim.
Me të ardhmen e pasigurt të transferimeve të të dhënave BE-ShBA, Meta është e shqetësuar se nuk do të jetë në gjendje të mbështetet as në klauzola standarde kontraktuale, as në një marrëveshje të re për të vazhduar operacionet e saj. Si rezultat, ajo paralajmëroi në raportin e saj vjetor se mund “të mos jetë në gjendje të ofrojë një numër të produkteve dhe shërbimeve tona më të rëndësishme, duke përfshirë Facebookun dhe Instagramin, në Evropë”.
“Ne nuk kemi absolutisht asnjë dëshirë dhe asnjë plan për t’u tërhequr nga Evropa, por realiteti i thjeshtë është se Meta, dhe shumë biznese, organizata dhe shërbime të tjera, mbështeten në transferimin e të dhënave midis BE-së dhe ShBA-së për t’i operuar shërbimet globale,” tha zëdhënësi i kompanisë.
Meta është larg nga e vetmja kompani që përballet me pasigurinë, megjithëse mund të jetë ndër kompanitë më të mëdha dhe më të profilizuara. Shumë kompani me seli në ShBA dhe BE, të mëdha dhe të vogla, janë të shqetësuara për të ardhmen e transferimeve të të dhënave dhe janë në pritje të një marrëveshjeje të re që do të sigurojë të ardhmen e operacioneve të tyre.
© SYRI.net
‘Putin nuk do të ndalet në Ukrainë’/ Paralajmëron Biden: E gjithë Evropa është e kërcënuar!
Macron: Franca dhe SHBA do të bëjnë gjithçka për të ndaluar përshkallëzimin e luftës në Lindjen e Mesme
Protestuesit pro-palestinezë mblidhen rreth Shtëpisë së Bardhë
Denonco
Merrni lajmet më të fundit nga SYRI.net në çdo moment dhe kudo që të jeni!
