Fitorja e Borussia Dortmundit ndaj PSG-së është një lajm i shkëlqyer për futbollin gjerman, i cili nga sezoni i ardhshëm do të ketë pesë skuadra në kompeticionin më të lartë evropian: Champions League. Marco Rose, aktualisht trajneri i Leipzigut, nuk e fsheh faktin se e ka pritur me shumë gëzim arritjen e “një objektivi të rëndësishëm, që na jep siguri në planifikim”.

Leipzig ka kohë që lufton me Borussia Dortmundin për vendin e katërt dhe pas përplasjes së drejtpërdrejtë në javën e fundit të Bundesligës kaloi pesë pikë para skuadrës së Terzicit.

Megjithatë, Rose deklaroi se nuk dëshiron të dhurojë pikë në 3 ndeshjet e fundit të kampionatit:

“Ne jemi dhe mbetemi ambiciozë. Nuk dua të shoh ndonjë relaksim, synojmë vendin e tretë”, tha ai në konferencën për shtypin në prag të ndeshjes kundër Hoffenheimit.

Leipzigu, i cili ka grumbulluar 22 nga 24 pikët e fundit në dispozicion, nuk do të bëjë rotacione të mëdha në ndeshjet e mbetura, kundër Ëerder Bremenit (11 maj) dhe Eintracht Frankfurtit (18 maj).

“Nuk kemi ndërmend të dhurojmë asgjë, por do t’u jap më shumë shanse atyre që kanë luajtur më pak”.