Mbrojtësi i Milanit, Alessandro Florenzi, është nën hetim për vënien e basteve, vetëm disa javë pasi Sandro Tonali dhe Nicolo Fagioli janë pezulluar nga futbolli.

Agjencia e lajmeve AGI raporton se mbrojtësi i djathtë i Milanit po hetohet për lojëra të paligjshme të fatit, pasi skandali i basteve në Itali po vazhdon.

Të dy, Nicolo Fagioli i Juventusit dhe Sandro Tonali i Newcastle janë pezulluar, përkatësisht për 7 muaj dhe 10 muaj.

Florenzi, mësohet se në ditët në vijim pritet të takohet me prokurorin italian për të diskutuar çështjen.

Ai mbetet një lojtar i dobishëm i skuadrës së Milanit dhe ka startuar pesë ndeshje në Serie A këtë sezon.

32-vjeçari ka një kontratë me Milanin deri në vitin 2025 dhe ai ka luajtur 49 herë për klubin e “San Siros” që kur u bashkua në vitin 2022.