Shqipëria U-17 do të zhvillojë dy takime miqësore ndaj bashkëmoshatarëve të Turqisë gjatë këtij muaji. Siç është bërë me dije edhe më herët nga Departamenti i Komunikimit në FSHF, kuqezinjtë e drejtuar nga trajneri Ervin Bulku do të luajnë dy miqësoret në datat 18 dhe 20 janar.

Federata Shqiptare e Futbollit dhe Federata Turke e Futbollit kanë gjetur dakordësinë që të dy këto takime të luhen në Shqipëri, ku sfida e parë do të luhet në Tiranë, më 18 janar, në stadiumin kombëtar ‘Air Albania’ në ora 17:00, ndërsa takimi i dytë mes dy përfaqësueseve do të zhvillohet në stadiumin “Elbasan Arena” më 20 janar në ora 15:00.

Sakaq, Ervin Bulku shpalli ditën e sotme edhe listën me 25 futbollistët e thirrur për të përfaqësuar Shqipërinë në këto dy sfida miqësore, pjesa më e madhe e të cilëve kanë qenë aktivë dhe të ftuar edhe më parë nga ekipi kombëtar. 12 prej tyre luajnë në kampionatet e huaja, duke u aktivizuar me ekipe si Vfb Stuttgart, Sampdoria, Perugia, Sudtirol, Brescia etj., ndërsa pjesa tjetër luajnë në kampionatin shqiptar.

Kuqezinjtë do të grumbullohen të dielën e 15 janarit në Durrës, ku do të zhvillojnë edhe seancat stërvitore në kuadër të përgatitjeve për këto dy sfida miqësore, që janë shumë të rëndësishme për Kombëtaren U-17.

Ndeshjet kundër Turqisë do të ngrenë edhe siparin e grumbullimeve, seleksionimeve e takimeve të tjera miqësore në kuadër të përgatitjeve të ekipit kombëtar U-17 për kualifikueset e Kampionatit Europian 2023, ku Shqipëria është shortuar në Elite Round së bashku me Francën, Zvicrën dhe Letoninë. Ndeshjet e grupit 8 të kësaj faze do të luhen në vendin tonë në muajin mars.