Kryeministri grek, Mitsotakis nuk do t’i bashkohet 'Bordit të Paqes' në SHBA

Kryeministri grek, Kyriakos Mitsotakis, nuk do t’i bashkohet të ashtuquajturit “Bord i Paqes” të presidentit amerikan Donald Trump, i cili pritet të zhvillojë seancën e tij të parë më 19 shkurt në Uashington, DC.

Lajmi u konfirmua nga zëdhënësi i qeverisë greke, Pavlos Marinakis, gjatë një konference për shtyp të enjten. “Nuk është në axhendën e kryeministrit,” deklaroi ai, duke lënë të kuptohet se Athina zyrtare nuk ka planifikuar pjesëmarrje në këtë nismë.

“Bordi i Paqes” u prezantua fillimisht si një grup i vogël liderësh me qëllim mbikëqyrjen e një armëpushimi të mundshëm në Gaza. Megjithatë, më vonë presidenti amerikan zgjeroi ftesën për dhjetëra vende të tjera dhe sugjeroi se organizata mund të evoluojë në një mekanizëm më të gjerë për ndërmjetësimin dhe zgjidhjen e konflikteve ndërkombëtare.

Nuk është bërë e ditur nëse Greqia do të përfaqësohet në ndonjë nivel tjetër në këtë iniciativë apo nëse do të mbajë një qëndrim zyrtar në vijim.