Fermerët pritet të shpallin zyrtarisht sot listën e kërkesave të tyre, ndërsa të shtunën njoftuan se nuk do t’i përgjigjen ftesës së kryeministrit grek Kyriakos Mitsotakis për një takim në rezidencën qeveritare Maximou, i planifikuar për pasditen e së hënës. Ftesa ishte bërë publike nga vetë kryeministri nga foltorja e Parlamentit.

Sot pritet gjithashtu reagimi i Kyriakos Mitsotakis përmes postimit të tij javor në Facebook. Ndërkohë, zëdhënësi i qeverisë, Pavlos Marinakis, gjatë debatit për buxhetin, u shpreh se është i vështirë dialogu kur siç tha ai nuk ka një bashkëbisedues që paraqet kërkesa konkrete, duke folur për një “dialog të shtirë”.

Marinakis përsëriti thirrjen e qeverisë për dialog të hapur dhe publik, duke theksuar se nuk do të pranohen bisedime pas dyerve të mbyllura, ndërsa paralajmëroi edhe për pasoja ligjore në rast të bllokadave të reja në rrugë.

LEXO EDHE: Fermerët grekë bllokojnë portin e Selanikut me traktorë dhe bomba tymi

Çfarë kërkojnë fermerët?

Në qendër të protestave janë kostoja e lartë e prodhimit, vonesat në pagesat e ndihmave dhe problemet strukturore të sektorit primar.

Ndër kërkesat kryesore përfshihen:

Parashkrimi i ndjekjeve penale për fermerët

Pagesa e menjëhershme e të gjitha shumave të prapambetura

Vendosja e çmimeve minimale të garantuara për produktet bujqësore

Energji elektrike me kosto të ulët për prodhimin

Karburant pa taksa për përdorim bujqësor

Riorganizimi i OPEKEPE-së

Rikthimi i fondeve të vjedhura tek përfituesit e vërtetë

Publikimi i emrave të përgjegjësve

Krijimi i një strukture të veçantë për peshkatarët dhe bletarët

Probleme serioze për blegtorët

Theks i veçantë i vihet situatës së blegtorëve, të cilët përballen me pasoja të rënda për shkak të lisë së deleve. Ata kërkojnë:

Vaksinim të menjëhershëm

Kompensim të plotë për dëmet

Zëvendësim të të ardhurave të humbura

Rimbushje falas të tufave

LEXO EDHE: Fermerët grekë vijojnë bllokadën, të shtunën takimi mbarëkombëtar

Fermerët kanë paralajmëruar se do të qëndrojnë në bllokada edhe gjatë festave, duke mos përjashtuar veprime më dinamike nëse nuk ka përgjigje konkrete nga qeveria.

“Derisa qeveria të marrë një qëndrim të qartë ndaj kërkesave tona, ne nuk largohemi nga bllokadat”, theksojnë ata, sipas onlarissa.gr, duke shtuar se në planin e tyre përfshihet edhe mbyllja e rrugëve dytësore.