Vuçiç kërkon përsëri një mënyrë për të frikësuar qytetarët: Terrorizëm, kaos dhe veprim shtetëror

Presidenti serb Aleksandar Vuçiç ka rritur ndjeshëm retorikën e tij politike duke akuzuar protestuesit për terrorizëm, pa dhënë prova konkrete.

Sipas tij, ngjarjet e fundit në Novi Sad dhe Valjevo përbëjnë “akte të pastra terrorizmi”, ndërsa ai paralajmëroi se “është çështje ditësh para se ata të fillojnë të vrasin hapur në rrugë”. Vuçiç kërkoi veprim më të fortë nga prokurorët, duke nënkuptuar masa të paprecedenta nga shteti, pa zbuluar detaje konkrete për atë që do të ndërmerret.

Kjo deklaratë është interpretuar nga opozita si përpjekje për të frikësuar qytetarët dhe për të shtuar presionin ndaj atyre që protestojnë kundër qeverisë. Ish-prokurorja Jasmina Paunović e cilësoi këtë si “kërcënimin më të madh që presidenti ka bërë ndonjëherë”, duke theksuar se populli i është kundërvënë gjithmonë çdo force shtetërore të padrejtë. Ministri i Drejtësisë, Nenad Vujić, mbështeti presidentin, duke deklaruar se institucionet duhet të japin një përgjigje të fortë dhe të qartë ndaj “terroristëve”.

Nga ana tjetër, sociologu serb Đokica Jovanović vlerësoi se retorika e Vuçiçit ngjan me praktikat e regjimeve autokratike, të cilat kanë përdorur gjithmonë etiketime të tilla për të justifikuar dhunën ndaj qytetarëve. Sipas tij, përshkallëzimi i situatës vetëm po i zemëron njerëzit dhe po i nxjerr më shumë në rrugë, duke rritur tensionin shoqëror.

Studenti Dušan Ristić, i pranishëm në protestat, theksoi se qytetarët nuk janë terroristë, por njerëz të zemëruar që nuk shohin rrugëdalje tjetër veçse përmes protestës. Ai kujtoi se për muaj të tërë protestuesit kanë kërkuar zgjedhje të parakohshme, por qeveria i ka injoruar, duke i ofruar në vend të tyre “fishekzjarre”.

Kriza politike në Serbi mbetet e hapur, me një president që paralajmëron masa drastike dhe qytetarë që kundërshtojnë gjithnjë e më ashpër diskursin e pushtetit.