Përleshje në Rodos mes protestuesve dhe policisë greke gjatë vizitës së anijes turistike izraelite

Përleshje të vogla shpërthyen të hënën në ishullin grek të Rodosit mes policisë së trazirave dhe një grupi protestuesish pro-palestinezë, të cilët demonstruan kundër luftës në Gaza, ndërsa një anije izraelite turistike kishte ndaluar në port. Sipas mediave greke, aktivistët brohorisnin “Liri për Palestinën” pranë portit, përpara se të përplaseshin me forcat e sigurisë që i shtynë me forcë.

Anija e lundrimit Crown Iris, e cila thuhet se mbante më shumë se 600 turistë, shumica izraelitë, u ankorua në ishull si pjesë e një itinerari të paracaktuar. Megjithëse pasagjerët zbarkuan pa incidente, ngjarja ndezi debate të forta mes komunitetit lokal dhe grupeve aktiviste, me bizneset në Rodos që kundërshtuan protestën duke shqetësuar për ndikimin në turizëm.

Ndërkohë, javën e kaluar, Crown Iris u detyrua të largohej nga ishulli tjetër grek, Syros, pa zbarkuar pasagjerët, pasi mbi 150 protestues shpalosën flamuj palestinezë dhe bënë thirrje për t’i dhënë fund ofensivës izraelite në Gaza. Aty nuk pati përplasje me policinë.

Incidenti në Syros ka marrë përmasa diplomatike, me Ministrin e Jashtëm të Izraelit, Gideon Sa’ar, që kontaktoi homologun grek George Gerapetritis për të shprehur shqetësimin e tij mbi situatën. Tensionet rreth pranisë së turistëve izraelitë në ishujt grekë duket se po rriten, teksa lufta në Gaza vijon të nxisë reagime të forta në arenën ndërkombëtare.