Zjarret përfshijnë sërish Greqinë, evakuohen fshatra në Korinth

Një zjarr i fuqishëm ka shpërthyer pranë qytetit jugor të Korinthit në Greqi, duke detyruar evakuimin e disa fshatrave, teksa vendi po përballet me temperatura ekstreme dhe kushte të thata që po ndihmojnë përhapjen e flakëve. Mbi 180 zjarrfikës, të mbështetur nga 15 avionë dhe 12 helikopterë, janë angazhuar për të luftuar flakët në një pyll me pisha në zonat malore të komunës, sipas autoriteteve lokale. Deri më tani nuk raportohet për të lënduar, por situata mbetet kritike.

Sipas një raporti të vitit 2024 nga Shërbimi i Ndryshimeve Klimatike Koperniku i BE-së, Evropa është kontinenti që po përjeton ngrohjen më të shpejtë në planet, duke u nxehur dy herë më shpejt se mesatarja globale që nga vitet 1980. Në disa zona të Greqisë, temperaturat kanë kapur vlerën prej 40 gradë Celsius, duke krijuar kushte përvëluese për ekipet e emergjencës.

Ndërkohë, një helikopter zjarrfikës u rrëzua në det më herët të martën gjatë një operacioni për mbledhje uji pranë Athinës. Fatmirësisht, tre anëtarët e ekuipazhit u shpëtuan dhe u transportuan për trajtim mjekësor në një spital të afërt. Zjarret në pyje janë të zakonshme gjatë verës në Greqi, por këtë vit autoritetet kanë regjistruar dhjetëra shpërthime zjarresh, duke vënë në alarm shërbimet e emergjencës.

Në përballje me këto sfida, qeveria greke ka ndërmarrë masa të jashtëzakonshme duke rritur numrin e zjarrfikësve dhe duke dyfishuar flotën e dronëve për të monitoruar situatën nga ajri. Ekspertët paralajmërojnë se ndryshimet klimatike janë faktor kyç në përkeqësimin e kushteve të zjarreve, të cilat po bëhen gjithnjë e më të shpeshta dhe më të rrezikshme.

Kujtojmë se Greqia ka përjetuar tragjedi të mëdha nga zjarret në të kaluarën. Në vitin 2018, një zjarr shkatërrues në qytetin bregdetar të Matit la pas mbi 100 viktima, përfshirë njerëz që humbën jetën ndërsa përpiqeshin të shpëtonin nga flakët. Rreziku në rajon vijon të mbetet i lartë për shkak të valëve të të nxehtit, thatësirës dhe erërave të forta që ndihmojnë përhapjen e zjarreve.