Drejtuesi i Prokurorisë së Posaçme, Altin Dumani, deklaroi dje para Komisionit Parlamentar të Ligjeve se nuk ka asnjë informacion se çfarë është bërë me dosjen “184”, në të cilën u përgjuan drejtues të lartë shtetërore, duke komunikuar për sigurimin e votave në mënyrë të paligjshme në zgjedhjet e pjesshme lokale për Bashkinë e Dibrës, në vitin 2016.

Dumani deklaroi se kjo dosje i përket një kohe, kur ai nuk ka qenë drejtues i SPAK-ut. Por, ndërkohë që bënte këto deklarata, ai kishte në krahun e tij të djathtë kolegun Klodian Braho, pikërisht prokurorin që e degdisi dosjen nga Tirana në Dibër, ku edhe u shua plotësisht.

Hetimi për dosjen 184 nisi në vitin 2016 nga ish-Prokuroria për Krime të Rënda. Prokurorët që e ndoqën fillimisht atë çështje u shkarkuan nga Vetingu ose u transferuan në pozicione të tjera.

Pas largimit të prokurorëve të mëhershëm, dosja “184” i kaloi në dorë prokurorit Klodian Braho, i cili në atë kohë ushtronte funksionet tek Krimet e Rënda.

Prokurori Braho shpalli mos-kompetencën dhe e transferoi dosjen në Prokurorinë e Dibrës, megjithëse të dhënat e bëra publike nga Gazeta “Bild” tregonin se në atë dosje ishin të përfshirë personazhet shumë të larta të maxhorancës socialiste të Edi Ramës.

Për transferimin e dosjes “184” në Dibër dha sqarime publike edhe ish-Prokurorja e Përgjithshme e Përkohshme, Arta Marku. Në një deklaratë mediatike në gusht 2019, Marku ia la të gjithë përgjegjësinë prokurorit Klodian Braho.

Më vonë, Prokuroria e Dibrës e riktheu sërish dosjen për kompetencë tek Krimet e Rënda, e cila në atë kohë sapo kishte ndryshuar emrin në Strukturën e Posaçme Anti-Korrupsion, SPAK.

Në shkurt 2020, Klodian Braho, tashmë me statusin e prokurorit të SPAK-ut, e ridërgoi sërish dosjen 184 në Dibër, duke e shkatërruar përfundimisht hetimin më të rëndësishëm të krimit zgjedhor.

Pasi mori detyrën e kreut të SPAK-ut, Altin Dumani e ngriti në detyrë prokurorin Braho, duke e emëruar drejtues të seksionit kundër Korrupsionit në Prokurorinë e Posaçme.