Komisioni Qendror i Zgjedhjeve ka dhënë si propozimin votimin elektronik dhe me postë për të garantuar votën e emigrantëve, e cila do të zgjasë disa ditë para ditës së zgjedhjeve në Shqipëri.
Procesi i regjistrimit të personave që jetojnë dhe punojnë jashtë vendit propozohet të bëhet përmes aplikacionit të KQZ-së ku pasi të skanojnë dokumentin e identifikimit, zgjedhësi do të verifikohet përmes imazhit.
Më pas do të shfaqen të dhënat personale të votuesit nëpërmjet një formulari elektronike. Por përsëri qytetarët e diasporës do të përmbushin një hap tjetër, teksa do të regjistrojnë e-mailin, numrin e telefonit dhe adresën e banesës ku jetojnë jashtë vendit.
Nëse të dhënat janë të sakta, zgjedhësi duhet të zgjedhë formën e tretë të autentifikimit e cila do të aplikohet sa herë që ai akseson aplikacionin ku dhe hapi I fundit do të jetë aplikimi për t’u regjistruar si votues në zgjedhjet e radhës.
Përpos propozimit për regjistrimin, KQZ dha gjithashtu dhe hapat se si emigrantët do të votojnë.Pas skanimit të votuesit në aplikacion, në fashat ditore që KQZ do të lërë për votimin e emigrantëve do të shfaqet dhe fleta elektronike e votimit, ku qytetari do të duhet të konfirmojë zgjedhjen e tij.
Pas konfirmimit votuesit i shfaqen dy QR Code ku ka mundësinë të dërgojë kodet në KQZ elektronikisht ose me postë në adresën e institucionit.
Me të mbërritur në KQZ, me postë, kodet që gjenden në zarfe të ndarë ndahen fizikisht në dy ambiente të ndryshme ku përpunohen nga staf i ndryshëm Dekodohet vetëm QR kodi mbi identitetin e votuesit me anë të një skaneri.
KQZ menjëherë pas leximit të QR për identitetin e votuesit, përmes sistemit elektronik njofton votuesin se vota ka arritur në KQZ dhe do të numërohet në datën dhe orën e përcaktuar.
Në formën elektronike votuesi mund të votojë disa here, por do të merret parasysh vetëm vota e fundit që ai ka përzgjedhur.
© SYRI.net