Kryeministri Albin Kurti ka komentuar deklaratën e kryeministrit të Shqipërisë, Edi Rama, se Shqipëria gjithmonë ka qëndruar dhe qëndron pranë Kosovës dhe se çdo sulm mbi Kosovën është sulm mbi Shqipërinë.

Nga Gjilani, kryeministri Kurti ka thënë se pret përkrahje nga Shqipëria më shumë se nga kushdo tjetër.

“Ne presim prej Republikës së Shqipërisë gjithnjë më shumë e më mirë se sa nga kushdo tjetër dhe në këtë vit kemi plane se si bashkëpunimin tone ta shtojmë në çdo aspekt”, tha ai.

Ndërsa kur u pyet për ndonjë takim të mundshëm me palën serbe, Kurti u shpreh se do të udhëtojë në Bruksel vetëm nëse do të ketë nënshkrim të marrëveshjeve.

“Kemi diskutuar temat të cilat janë të dialogut dhe rëndësinë e nënshkrimit të marrëveshjes, por nuk më është thënë që do të ketë ftesë për një takim të nivelit të lartë në Bruksel”, theksoi Kurti.

Ai ka shtuar se normalizimi duhet të bëhet, por nuk mund të arrihet njëanshëm. Kryeministri i Kosovës, Albin Kurti, ka përsëritur qëndrimin e tij se Kosova ka raporte të mira me Shtetet e Bashkuara të Amerikës.