Të hënën, në shenjë revolte kundër pezullimit të certifikatës së biznesit të Klan Kosovës nga Ministria e Industrisë, Ndërmarrësisë dhe Tregtisë, Asociacioni i Gazetarëve të Kosovës (AGK), ka organizuar një protestë në qytetin e Prishtinës.

Me motonin “Demokracia vdes në errësirë”, gazetarët tashmë janë dalë në rrugë për të shprehur solidaritetin e tyre me Klan Kosovën dhe për të luftuar për lirinë e medias në vend.

Protesta ka filluar në orën 12:00, në sheshin “Zahir Pajaziti”, ku masa e njerëzve është duke u rritur në çdo moment.

Qytetarë, organizata të shoqërisë civile dhe kolegë të gazetarisë janë bashkuar në këtë akt të fuqishëm të protestës, duke kërkuar respektimin e lirisë së medias dhe të drejtën e informimit të publikut.

Refuzohet ankesa e Klan Kosovës – Vendimi i ARBK-së për pezullimin e certifikatës “në përputhje me ligjin”

Me anë të kësaj proteste, AGK-ja synon të shprehë zemërimin dhe shqetësimin e tyre për situatën e tanishme dhe të mbrojë lirinë e shtypit dhe demokracinë në Kosovë.

Protesta paralajmërohet të jetë paqësore dhe ndërgjegjësuese, duke shprehur një thirrje të fuqishme për transparencë dhe përgjegjësi në vendimmarrjen institucionale.

Ministria e Industrisë, Ndërmarrësisë dhe Tregtisë (MINT), të premten, më 28 korrik, përmes një njoftimi bëri të ditur se Komisioni për Shqyrtimin e Ankesave për Regjistrimin e Bizneseve ka marrë vendim për refuzimin e ankesës së Shoqërisë Tregtare “Klan Kosova sh.p.k.”.

Kështu, ky komision ka konstatuar se ARBK-ja “në shkallën e parë, ka vendosur në përputhje me ligjin kur e pezulloi certifikatën e biznesit të Klan Kosovës sh.p.k.”.

“Goditja më të rëndë ndaj lirisë së medias në Kosovë”

Asociacioni i Gazetarëve të Kosovës, pas vendimit ka thënë se është i tronditur me vendimin e Qeverisë Kurti për mbylljen e Klan Kosovës, duke e cilësuar si “goditjen më të rëndë që i bëhet lirisë së medias në Kosovë që prej kohës së luftës”.

Kujtojmë se në qershor të këtij viti, Ministria e Industrisë, Ndërmarrësisë dhe Tregtisë kishte ngritur një kallëzim penal kundër “Klan Kosovës”, me pretendimin se në certifikatën e biznesit të saj, te ndërrimi i pronarëve, janë shfaqur emrat “Pejë – Serbi” dhe “Gjakovë – Serbi”.

Klan Kosova e ka cilësuar të padrejtë pretendimin e ministrisë, duke thënë se “Klani i ka si dëshmi të gjitha dokumentet që konfirmojnë se pronari i kompanisë është i regjistruar në komunën e Gjakovës të Republikës së Kosovës”.

Ndërkaq, me 4 korrik të këtij viti, Klan Kosova, kishte dorëzuar ankesë në Agjencinë për Regjistrimin e Bizneseve të Kosovës. Me të synohej të anulohet vendimi i datës 21 qershor për suspendimin e certifikatës së Biznesit.