Ka përfunduar bastisja e EULEX-it në zyret e OVL të UÇK-së.

Sekretari i OVL të UÇK-së Faton Klinaku, u tha medieve të premten mbrëma se bastisja ka zgjatur shumë për shkak të kontrollimit të dokumentacioneve.

“I kanë marrë kompjutera. Përveç tyre kanë marrë edhe disa xhirimet me kamera”, ka thënë ai.

Ndërkohë, avokati Tomë Gashi ka thënë se arrestimi i Hysni Gucatit dhe Nasim Haradinajt me akuzën e pengimit të drejtësisë.

Njësitë e policisë së Misionit të Bashkimit Evropian për sundimin e ligjit, arrestuan të premten kryetarin e Organizatës së Veteranëve të Luftës së Ushtrisë Çlirimtare të Kosovës, Hysni Gucati.

Në orët e pasdites, njësitë e policisë së EULEX-it, të Kosovës dhe pjesëtarë të Prokurorisë së Posaçme për krime lufte me seli në Hagë, arrestuan edhe nënkryetarin e kësaj organizate, Nasim Haradinaj.

Të martën kjo Organizatë tha se një person i panjohur ka lënë dokumente, që pretendohet se përmbajnë aktakuza të përgatitura ndaj udhëheqësve më të lartë të Ushtrisë Çlirimtare.

Zyra e Prokurorit të Specializuar në Hagë, që trajton pretendimet për krime lufte në Kosovë, tha të martën se është e angazhuar që të hetojë dhe të ndjekë ata që publikojnë identitetin e individëve që mund të thirren para Gjykatës së Posaçme.