Disa shoferë dhe pasagjerë, në autostradën ‘Arbën Xhaferi’ në Kosovë, konkretisht në urën mbi lumin Lepenc, për kuriozitet dhe për shkak të bukurive që ofron kjo urë, ndalojnë me automjetet e tyre në shiritat emergjentë dhe zbresin nga automjetet për fotografi, madje edhe në grupe, duke rrezikuar sigurinë e tyre por edhe të shoferëve të tjerë.
Ndaj, Policia e Kosovës, Njësia për Kontroll të Autostradave, njoftoi se që të parandalojë aksidentet në autostradën ‘Arbën Xhaferi’, ka zbatuar një plan operativ dhe gjatë tri javëve të shkuara ka dhënë 33 gjoba:
28 gjoba ndaj shoferëve për ndalim në autostradë, 5 gjoba për lëvizjen e këmbësorëve në autostradë.
Policia e Kosovës, apelon dhe kërkon nga qytetarët në përgjithësi dhe drejtuesit e automjeteve në veçanti, që të respektojnë rregullat e trafikut rrugor, me theks të veçantë të mos bëjnë shkelje të rregullave të qarkullimit në autostradë sepse po rrezikojnë jetën e tyre dhe të tjerëve. Policia do të ndëshkojë të gjithë ata që bëjnë shkelje të tilla.
© SYRI.net