Japonia ka regjistruar këtë vit verën e saj më të nxehtë që nga fillimi i mbajtjes së të dhënave në vitin 1898, raportoi Gigi Press, duke cituar Agjencinë Meteorologjike të Japonisë. Sipas agjencisë, temperatura mesatare për muajt qershor, korrik dhe gusht ishte 2.36 gradë Celsius mbi mesataren 30-vjeçare deri në vitin 2020, duke thyer rekordin e mëparshëm të regjistruar vitin e kaluar, kur temperatura u rrit 1.76 gradë Celsius mbi mesataren.

Yoshinori Oikawa, kreu i Qendrës së Informacionit për Ekstremet Klimatike të agjencisë, e përshkroi këtë rekord si “jashtëzakonisht të lartë” dhe paralajmëroi se ngrohja globale do të sjellë më shumë vera të nxehta në të ardhmen.

Edhe Koreja e Jugut ka përjetuar këtë sezon verën më të nxehtë në histori për të dytin vit radhazi, për shkak të valëve të vazhdueshme të nxehtësisë. Administrata Meteorologjike e Koresë raportoi një temperaturë mesatare prej 25.7 gradë Celsius nga 1 qershori deri më 31 gusht, duke tejkaluar rekordin e vitit të kaluar prej 25.6 gradë Celsius dhe duke shënuar verën më të nxehtë që nga viti 1973, kur vendi filloi të mbledhë të dhëna meteorologjike.

Ky fenomen nënvizon efektet e vazhdueshme të ndryshimeve klimatike në rajonin e Azisë Lindore dhe shqetëson ekspertët për ndikimet e mundshme në shëndetin publik dhe ekonominë lokale.