Princ Harry dhe Meghan nënshkruajnë një marrëveshje të re shumëvjeçare me Netflix

Duka dhe Dukesha e Sussex, Princi Harry dhe Meghan Markle, kanë njoftuar se do të zgjasin bashkëpunimin me Netflix për prodhimin e filmave dhe serialeve televizive. Marrëveshja e re, e përshkruar si “shumëvjeçare, me shikim të parë”, i jep Netflix-it të drejtën e parë mbi projektet e propozuara nga kompania e tyre e prodhimit, Archewell.

Edhe pse më e lirshme se marrëveshja e vitit 2020 — e vlerësuar rreth 100 milionë dollarë — ky hap hedh poshtë zërat për ndarje të plotë mes çiftit dhe platformës. Meghan u shpreh se partneriteti me Netflix i ka frymëzuar për të krijuar “përmbajtje të menduar mirë, që rezonon globalisht dhe feston vizionin tonë të përbashkët”.

Njoftimi vjen pak para publikimit të sezonit të dytë të emisionit të saj të gatimit With Love, Meghan, më vonë këtë muaj. Seriali i parë, me 5.3 milionë shikime, nuk arriti të renditej në 300 programet më të ndjekura të Netflix në gjysmën e parë të vitit 2025. Në krahasim, dokumentari Harry & Meghan (2022) arriti 23.4 milionë shikime pas lançimit.

Archewell ka paralajmëruar edhe një episod special të Krishtlindjeve për With Love, Meghan, si dhe një shfaqje të re dokumentare këtë vit, Masaka Kids, A Rhythm Within, që tregon historinë e një jetimoreje në Ugandë, në sfondin e krizës së HIV/AIDS.

Bela Bajaria, drejtoresha e përmbajtjes në Netflix, tha se “Harry dhe Meghan janë zëra me ndikim, historitë e të cilëve jehojnë kudo” dhe se projektet e tyre kanë tërhequr një interes të madh nga publiku.