Grupi bankar Pireu lajmëroi se shitja e degës së tij në Shqipëri, Tirana Bank do të finalizohet brenda këtij viti. Shitja është pjesë e një plani të gjerë ristrukturimi, sipas të cilit grupi grek synon të tërhiqet nga katër vende të Ballkanit, Shqipëri, Bullgari, Serbi dhe Rumani.

Largimi i grupit Pireu nga Shqipëria, pason atë të një grupi tjetër grek, përkatësisht Bankës Kombëtare Greke të njohur si NGB. Në fillim të këtij viti, NBG u ble nga ABI Bank, në bordin drejtues të së cilës ulet bashkëshortja e kryeministrit Edi Rama, zonja Linda Rama.

Madje ABI Bank është një nga kandidatët kryesor edhe për blerjen e Tirana Bank. Syri.net ka mësuar se pak ditë më parë, drejtuesit e ABI-t kanë bërë prezantimin e Tirana Bank para stafit të tyre duke zyrtarizuar qartë tentativën për blerjen e kësaj banke.

Shitja e Tirana Bank po shkakton një luftë të fortë në treg, në të cilën është përfshirë edhe qeveria shqiptare, e cila sponsorizon blerjen e kësaj banke nga ABI Bank.

Qeveria presion grekëvë

Qeveria shqiptare është duke i bërë presion Pireus Bank që të shesë degën e saj në Shqipëri, tek Banka Amerikane e Investimeve.Syri.net ka mësuar nga burime të sigurta se në garën për të blerë Tirana Bank ka dy blerës potencialë. E para është Libank, një bankë me ekspertizë ndërkombëtare dhe lidhje të forta në Shtetet e Bashkuara dhe Angli. Ndërsa banka e dytë që ka shfaqur interes për blerjen e Tirana Bank është ABI.

Burime të sigurta thonë se grupi Pireus preferon që Tirana Bank të shitet tek Libank. Por qeveria shqiptare ushtron presion politik dhe jo ligjor, që grekët ta shesin bankën tek ABI Bank.

Banka e kryeministrit

Abi Bank përbën një precedent në sistemin bankar të Shqipërisë. Ajo është e vetmja banka, pronësia e së cilës është e pagjurmueshme, pasi vjen nga parajsat fiskale. Ndonëse u licencua në mënyrë të dyshimtë dhe në shkelje të ligjit, Abi Bank është zgjeruar me ritme të vrullshme në treg. Pak muaj më parë ajo bleu NBG, ndërkohë që tani po tenton të blejë edhe Tirana Bank, çka do ta bënte ABI-n, automatikisht bankën e tretë më të madhe në Shqipëri.

Zgjerimi agresiv i ABI Bank ka shqetësuar institucionet ndërkombëtare që mbikëqyrin ekonominë shqiptare, veçanërisht FMN-në. Pak kohë më parë, FMN lëshoi një deklaratë publike duke i kërkuar Bankës së Shqipërisë të ndalë licencimin e bankave, të cilat nuk përmbushin kriteret ligjore dhe që kanë konflikt interesi. 

ABi Bank është banka e vetme e ekspozuar politikisht në Shqipëri. Opozita e ka cilësuar atë si bankën personale të kryeministrit, e cila është e përfshirë në pastrim parash. Por pavarësisht shqetësimeve të FMN dhe akuzave të opozitës, ABI, banka e lidhur drejtpërdrejtë me kryeministrin shqiptare Edi Rama, nuk ndalet. Ajo vazhdon të zgjerohet me ritme të vrullshme dhe pas NBG tashmë me ndihmën e qeverisë do të shtjerë në dorë edhe Tirana Bank.