Nga Louis Casiano, FOX NEWS

Mesazhet e sapopublikuara mes autorëve të një studimi shumë të cituar mbi origjinën e COVID-19 tregojnë se ata kishin shprehur privatisht dyshime nëse virusi vinte nga lakuriqët e natës, ndryshe nga sa deklaronin në studimin e tyre.

Senatori amerikan Rand Paul (republikan nga Kentaki) publikoi të martën mesazhet e brendshme të shkëmbyera mes autorëve të studimit “The Proximal Origin of SARS-CoV-2”: Kristian Andersen, Robert Garry, Eddie Holmes dhe Andrew Rambaut.

“Ideja që virusi erdhi nga një laborator u paraqit si e pabesueshme, ndërsa privatisht ata thoshin të kundërtën. Ky nivel pandershmërie duhet të bëhet publik,” tha Paul për Fox News. “Këta janë njerëz që marrin grante shumëmilionëshe nga vendi ynë dhe ne nuk duhet t'u japim para njerëzve që na kanë gënjyer”.

Studimi u botua në revistën “Nature Medicine” në mars 2020 dhe u citua gjerësisht nga zyrtarët e shëndetit publik dhe mediat si autoriteti shkencor që përjashtonte origjinën laboratorike të SARS-CoV-2. Megjithatë, mesazhet e publikuara duket se tregojnë se autorët ishin shumë më pak të sigurt sesa sugjeronin përfundimet e tyre publike.

Disa autorë ngritën dyshime për origjinën laboratorike

Kristian Andersen vlerësonte se kishte 30% mundësi që virusi të kishte origjinë laboratorike, ndërsa Eddie Holmes i jepte 20%, një vlerësim që më vonë e uli në 10%. Në çdo rast, këto shifra bien në kontrast me deklaratat publike të studimit, sipas të cilit virusi nuk ishte manipuluar.

Sipas dokumenteve, më 11 qershor 2020, Andersen shkruante: “Pjesa me të cilën po has më shumë vështirësi është se, në fund të fundit, nuk kemi prova të forta në asnjërin drejtim dhe, sidomos duke pasur parasysh disa prova të fundit, nuk mund ta përjashtojmë që dikush ta ketë futur atë aty. Kjo nuk do të thotë se dikush e bëri, por nuk mund ta përjashtojmë. Studimi ynë ishte shumë kategorik duke thënë 'nuk ka asnjë mundësi', por në këtë fazë kam më pak besim te ajo deklaratë”.

Debat për vendin e ndarjes së furinës

Dokumentet tregojnë gjithashtu debate të brendshme për vendin e ndarjes së furinës (furin cleavage site), një tipar gjenetik që ndodhet në qendër të debatit mbi teorinë e rrjedhjes nga laboratori.

Në një moment, Andersen u shkroi kolegëve se kishin dalë në pah “disa prova që ngjajnë me armë tymuese”, të cilat e bënin të ndihej “jo rehat” dhe se kishte “më pak besim” në përfundimet e mëparshme.

Bashkëpunim me agjencitë amerikane

Dokumentet tregojnë gjithashtu se autorët koordinonin komunikimin me komunitetin amerikan të inteligjencës dhe drejtuesit e Instituteve Kombëtare të Shëndetit (NIH), ndërkohë që mbronin publikisht përfundimet e tyre.

Një tjetër temë diskutimi ishte Ralph Baric, një studiues i njohur i koronavirusëve.

Megjithëse pranonin ekspertizën e tij, mesazhet e tyre zbulojnë një marrëdhënie shumë të tensionuar, të karakterizuar nga rivalitet profesional dhe dyshime se ai po përpiqej t'i minonte.

Ata dyshonin gjithashtu se Baric ishte burimi anonim, të cilin e quanin “Deep Throat”, që i kishte rrjedhur një gazetari informacione konfidenciale nga procesi i rishikimit shkencor. Sipas rrjedhjes së informacionit, autorët fillimisht kishin dyshuar për një origjinë laboratorike, përpara se të ndryshonin qëndrim.

Qëndrimet zyrtare mbeten të ndara

Një grup këshillimor shkencor i Organizatës Botërore të Shëndetësisë (OBSH) publikoi vitin e kaluar një raport ku arriti në përfundimin se pandemia ka shumë të ngjarë të ketë ardhur nga kalimi natyror i virusit nga kafshët te njerëzit (zoonotic spillover), drejtpërdrejt nga lakuriqët e natës ose përmes një strehuesi ndërmjetës.

Të hënën, Rand Paul publikoi gjithashtu dokumente që tregonin se agjentët e Doganës dhe Mbrojtjes Kufitare të SHBA-së (CBP) ishin përgatitur të merrnin në pyetje zoologun britanik Peter Daszak pas kthimit të tij nga hetimi i OBSH-së për origjinën e COVID-19, por më pas FBI u kërkoi atyre të tërhiqeshin.

Ndërkohë, Dr. Anthony Fauci, figura kryesore e përgjigjes amerikane ndaj pandemisë, pritet të dëshmojë këtë muaj para Komisionit të Senatit për Sigurinë Kombëtare dhe Çështjet Qeveritare, pasi Rand Paul, si kryetar i komisionit, ka lëshuar një urdhër për paraqitjen e tij.

Fauci është akuzuar nga disa kritikë se ka manipuluar informacionin mbi origjinën e pandemisë dhe se ka gënjyer Kongresin për të mbuluar shkelje të mundshme. Ai i ka mohuar vazhdimisht këto akuza.