Kancelari gjerman Friedrich Merz la të kuptohet të dielën se mund të ndërmarrë një riformatim të qeverisë së tij, pas dorëheqjes së Jens Spahn nga posti i kreut të grupit parlamentar të Unionit Kristian Demokrat (CDU).

Spahn dha dorëheqjen të shtunën pas publikimit të detajeve se ai dhe bashkëshorti i tij kanë pasur një fëmijë përmes një nëne surrogate në Shtetet e Bashkuara.

Në Gjermani, surrogacia është e ndaluar, ndërsa CDU-ja rikonfirmoi kundërshtimin e saj ndaj kësaj praktike në fillim të këtij viti. Kjo e ekspozoi Spahn-in, ish-ministër i Shëndetësisë dhe një prej figurave më të rëndësishme të partisë, ndaj akuzave për hipokrizi.

“Mund të jetë një mundësi për të menduar edhe një herë për përbërjen e qeverisë federale”, tha Merz në një intervistë për televizionin publik gjerman ZDF, e regjistruar të dielën dhe e transmetuar në mbrëmje. Megjithatë, kancelari theksoi disa herë se bëhej fjalë vetëm për një mundësi dhe jo për një plan konkret.

I pyetur për Thorsten Frei, shefin e kabinetit të tij, i cili nga ZDF është përmendur si një kandidat i mundshëm për të zëvendësuar Spahn-in, Merz nuk pranoi të konfirmonte asnjë emër. Emërimi i Frei-t do të krijonte një tjetër vend vakant në nivelet e larta të qeverisjes.

Gjatë intervistës, Merz gjithashtu nuk pranoi të mbronte personalisht Spahn-in, duke thënë se nuk e kishte pritur një reagim kaq të fortë publik.

“Ndoshta kjo kishte të bënte edhe me personin e tij, por edhe me mënyrën e komunikimit”, u shpreh kancelari.

Merz bëri të ditur se Spahn e kishte informuar rreth 10 ditë më parë për lindjen e fëmijës dhe i kishte kërkuar që çështja të mbahej private, gjë të cilën kancelari tha se e kishte respektuar. Sipas tij, Spahn e kishte informuar partinë “shumë, shumë vonë”, ndërsa dëmi ndaj besueshmërisë së CDU-së u bë “plotësisht i qartë” të shtunën.

“Dhe për këtë arsye ne më pas vepruam”, tha Merz sipas Politico.

Mediet gjermane raportuan të shtunën se Merz i kishte kërkuar Spahn-it të largohej nga posti.

I pyetur nëse ndihej i tradhtuar nga Spahn, Merz tha se nuk dëshironte ta komentonte publikisht këtë çështje. Ai e konsideroi çështjen të mbyllur dhe falënderoi Spahn-in për punën e tij në reformat e fundit të koalicionit qeverisës.

Sipas ZDF, drejtuesit e CDU-së pritet të diskutojnë në ditët e ardhshme për procesin e zgjedhjes së pasuesit të Jens Spahn.