Gati 162 milionë amerikanë nga 35 shtete janë nën alarme për të nxehtin ekstrem, ndërsa zjarret vdekjeprurëse vazhdojnë të digjen në Perëndimin e SHBA-së, me temperaturat që pritet të intensifikohen gjatë javës.

Qytetet në zonën e rrezikut përfshijnë Bostonin, Nju Jorkun, Filadelfian, Baltimorën, Uashingtonin, Çikagon, Mineapolisin, Sent Luisin, Nashvilin, Atlantën, Orlandon dhe Klivlendin, sipas NBC News, duke cituar Shërbimin Kombëtar të Motit.

Vala e të nxehtit ka të ngjarë të vazhdojë në pjesën qendrore të SHBA-së gjatë kësaj jave, duke u përhapur në verilindje nga e mërkura dhe duke zgjatur gjatë fundjavës së festës kombëtare.

Rreziku i lartë deri ekstrem nga të nxehtit vazhdon, me netët e ngrohta që kufizojnë lehtësimin dhe rrisin rreziqet për shëndetin. Kulmi i temperaturave pritet nga e enjtja deri të shtunën në rajonet e Midwest-it, Liqeneve të Mëdha, Atlantikut të Mesëm dhe Verilindjes, me gati 100 rekorde ditore temperaturash që mund të barazohen ose thyhen deri më 4 korrik.

Qyteti i Nju Jorkut mund të arrijë temperaturën 35°C të premten, me indeks nxehtësie prej 41°C. Uashingtoni dhe Raleigh në Karolinën e Veriut mund të arrijnë 39°C, me indeks nxehtësie rreth 42°C.

Kryetari i Bashkisë së Çikagos, Brandon Johnson, paralajmëroi banorët të hënën që të përgatiten për të nxehtin ekstrem, i cili “mund të jetë shumë i rrezikshëm”. Qyteti ndodhet nën paralajmërim për të nxehtin ekstrem deri të mërkurën, sipas Mike Bardou nga Shërbimi Kombëtar i Motit.

Ndërkohë, zjarret u përhapën në brendësi të Perëndimit të SHBA-së gjatë fundjavës, veçanërisht në Utah dhe Kolorado. Rreth 2 milionë njerëz ishin nën alarme për zjarre të hënën në Arizona, Kolorado, Nju Meksiko, Utah dhe pjesë të Wyoming-ut, Dakotës së Jugut dhe Nebraskës.

Tre zjarrfikës humbën jetën në kufirin mes Kolorados dhe Utah-ut, tha shefi i Shërbimit Amerikan të Zjarreve në Zonat e Egra, Brian Fennessy, duke shtuar se dy zjarrfikës të tjerë u plagosën.

Zjarri Cottonwood në jugperëndim të Utah-ut ka përfshirë më shumë se 93 mijë akra tokë dhe mbetet i kontrolluar vetëm në masën 4%, sipas WatchDuty.com.

Më shumë se 50 zjarre të mëdha janë aktive në të gjithë vendin, duke përfshirë mbi 460 mijë akra, sipas Qendrës Kombëtare Ndërinstitucionale të Zjarreve.

Paralajmërimet për cilësinë e ajrit mbeten në fuqi në pjesën më të madhe të Kolorados për shkak të tymit nga zjarret./ AA