OBSH ngre alarmin për krizën humanitare dhe shpërthimin e kolerës në rajonin Kordofan të Sudanit

Më shumë se 700 raste të dyshuara dhe 105 vdekje janë raportuar në Kordofanin Perëndimor që nga mesi i majit, sipas autoriteteve.

Organizata Botërore e Shëndetësisë (OBSH) paralajmëroi të mërkurën për një përkeqësim të situatës humanitare në rajonin Kordofan të Sudanit, duke përmendur një shpërthim në rritje të kolerës dhe shqetësime gjithnjë e më të mëdha për dhunën ndaj civilëve.

Drejtori i Përgjithshëm i OBSH-së, Tedros Adhanom Ghebreyesus, tha se kushtet në El Obeid, në shtetin e Kordofanit Verior, vazhdojnë të përkeqësohen për shkak të konfliktit.

“OBSH-ja i bashkohet shqetësimeve të ngritura nga Këshilli i Sigurimit i OKB-së për rrezikun e afërt të mizorive masive dhe mbështet kërkesën për ndërprerjen e menjëhershme të sulmeve”, tha Tedros gjatë një konference për shtyp në Gjenevë.

Në Kordofanin Perëndimor fqinj, Ministria e Shëndetësisë e shtetit raportoi 734 raste të dyshuara me kolerë dhe 105 vdekje që nga 15 maji, sipas Tedros.

“Shpërthimi po ndodh në kushtet e një sistemi shëndetësor të dëmtuar nga konflikti i zgjatur”, tha ai.

OBSH-ja dhe partnerët e saj po reagojnë duke zgjeruar aksesin në ujë të sigurt dhe kushte sanitare, duke ngritur qendra trajtimi për kolerën dhe duke vendosur paraprakisht teste të shpejta diagnostikuese dhe barna.

Tedros shtoi se mostrat po dërgohen gjithashtu në Sudanin e Jugut për analiza laboratorike./ AA