Ambasadori i Izraelit në OKB po bën thirrje që të revokohet një urdhër-arresti ndërkombëtar kundër kryeministrit Benjamin Netanyahu, pas pezullimit të kryeprokurorit të Gjykatës Ndërkombëtare Penale (GJPN). 

Pezullimi i Karim Khan "vërteton se ky institucion është i kalbur deri në palcë", shkroi të martën në X ambasadori i Izraelit në OKB, Danny Danon. "Tani është koha për të anuluar aktakuzat absurde kundër kryeministrit Netanyahu!"

Pezullimi i Khan erdhi mes akuzave për sjellje të pahijshme seksuale kundër një kolegeje të ngushtë. Prokurori britanik ka qenë në një pushim të përkohshëm për më shumë se një vit, dhe synon të kthehet sapo të zgjidhen akuzat. Ai i mohon të gjitha akuzat kundër tij.

Khan kishte qenë kryeprokuror i GJND-së që nga viti 2021 dhe kishte lëshuar një urdhër arresti kundër Netanyahut për krime lufte dhe krime kundër njerëzimit të lidhura me luftën në Gaza.

Për shkak të veprimeve të ashpra në luftën dyvjeçare në brezin bregdetar, gjatë së cilës u vranë dhjetëra mijëra njerëz, Izraeli është akuzuar vazhdimisht për krime lufte dhe, në disa raste, për gjenocid. 

Qeveria izraelite i hedh poshtë me forcë këto akuza. Ajo e përshkruan luftën si pjesë të një konflikti më të gjerë me Iranin dhe aleatët e tij rajonalë, të cilët kërkojnë të shkatërrojnë shtetin hebre.

Kryesisht për shkak të urdhrit të arrestit kundër Netanyahut, SHBA-të intensifikuan presionin ndaj gjykatës dhe vendosën sanksione ndaj stafit dhe gjyqtarëve./ DPA News.